11 
ភ្នំពេញ៖ សម្ដេចវិបុលសេនីភក្តី សាយ ឈុំ ប្រធានព្រឹទ្ធសភាជាតិ បានស្នើទៅឯកអគ្គរដ្ឋទូតប៉ាគីស្ថានថ្មីប្រចាំនៅកម្ពុជា ជំរុញឲ្យមានការវិនិយោគកាន់តែច្រើនមកកម្ពុជា ខណៈការផ្លាស់ប្តូរពាណិជ្ជកម្មរវាងប្រទេសទាំងពីរ មានកម្រិតនៅឡើយ ។
ក្នុងឱកាសអនុញ្ញាតិឲ្យឯកឧត្តម ហ្សាហៀរូឌីន បាបា ថាហ៊ីម (Zaheeruddin Babar Thaheem) ឯកអគ្គរដ្ឋទូតនៃសាធារណរដ្ឋអ៊ីស្លាមប៉ាគីស្ថានប្រចាំកម្ពុជា នៅថ្ងៃទី២៧ ខែឧសភា ឆ្នាំ២០២២ កម្ពុជា និងប៉ាគីស្ថាន បានបង្កើតទំនាក់ទំនងការទូតជាមួយគ្នា តាំងពីឆ្នាំ១៩៥២ ដែលរហូតមកដល់ ពេលនេះ មានរយៈពេល៧០ឆ្នាំ សូមឱ្យចំណងមិត្តភាព និងសហប្រតិបត្តិការរវាងប្រទេសទាំងពីរ ស្ថិតស្ថេរចីរកាល ។
សម្តេច បានបន្តថា អគ្គលេខាធិការដ្ឋានព្រឹទ្ធសភា នៃប្រទេសទាំងពីរ ធ្លាប់បានចុះហត្ថលេខាលើអនុស្សរណៈយោគយល់គ្នារយៈពេល៥ឆ្នាំ ប៉ុន្តែបានផុសសុពលភាព ដោយសម្ដេចបាន ស្នើទូតថ្មីប៉ាគីស្ថាន ជួយសម្របសម្រួលឲ្យមានការចុះហត្ថលេខាបន្ត លើអនុស្សរណៈយោគយល់គ្នារយៈពេល៥ឆ្នាំ បន្តទៀត ។
សម្តេច សាយ ឈុំ កត់សម្គាល់ឃើញថា ទំហំនៃការផ្លាស់ប្តូរពាណិជ្ជកម្ម វិនិយោគ និងទេសចរណ៍រវាងប្រទេសទាំងពីរ មានកម្រិតនៅឡើយ សម្តេចមានជំនឿថា បេសកកម្មការទូតរបស់ឯកអគ្គរដ្ឋទូតប៉ាគីស្ថានថ្មី នឹងជួយជំរុញឱ្យការវិនិយោគ ពីប៉ាគីស្ថានមកកម្ពុជាឱ្យបានកាន់តែច្រើន និងជំរុញការផ្លាស់ប្តូរពាណិជ្ជកម្ម ទេសចរណ៍រវាងប៉ាគីស្ថាន-កម្ពុជា ឱ្យកាន់តែមានកំណើនកាន់តែខ្ពស់ឡើង ដើម្បីរួមចំណែកដល់ការអភិវឌ្ឍសង្គម-សេដ្ឋកិច្ច និងវិបុលភាពសម្រាប់ប្រជាជន នៃប្រទេសទាំងពីរ ។
នៅក្នុងជំនួបនេះ ឯកអគ្គរដ្ឋទូតប៉ាគីស្ថាន បានឯកភាពចំពោះប្រសាសន៍របស់សម្តេចប្រធានព្រឹទ្ធសភា លើកឡើងអំពីទំនាក់ទំនង និងកិច្ចសហប្រតិបត្តិការដ៏ល្អប្រពៃ រវាងប្រទេសទាំងពីរ ជាពិសេសរវាងអន្តរសភា នៃប្រទេសកម្ពុជា និងប៉ាគីស្ថាន ៕
