13 
ភ្នំពេញ៖ ក្រសួងមហាផ្ទៃ បានអំពាវនាវជាថ្មីម្តងទៀតដល់កងកម្លាំងអនុវត្តច្បាប់ និងប្រជាពលរដ្ឋទាំងអស់ឱ្យចូលរួមប្រយុទ្ធប្រឆាំង នឹងបញ្ហាគ្រឿងញៀន ដែលមានការកើនឡើងកាលពីឆ្នាំមុន។
សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ នៅតែសម្តែងការ ព្រួយបារម្ភចំពោះបញ្ហាគ្រឿងញៀននៅប្រទេសកម្ពុជា ដែលនៅតែមានហានីភ័យខ្ពស់ចំពោះសង្គមជាតិ ប៉ុន្តែរាជរដ្ឋាភិបាលនៅតែមានទំនុកចិត្តក្នុងការបង្រ្កាប បើទោះបីតួលេខកាលពីឆ្នាំ២០២១ កន្លងទៅ មានការកើនឡើង រួមទាំងគ្រឿងញៀនសំយោគយ៉ាងណាក៏ដោយ។
តាមរយៈហ្វេសបុកផ្ទាល់ កាលពីថ្ងៃទី៣១ ខែមករា ឆ្នាំ២០២២ សម្តេចក្រឡាហោម ស ខេង បានលើកឡើងថា នៅឆ្នាំ២០២១កន្លងទៅ កម្ពុជានៅតែបន្តទទួលរងឥទ្ធិពលអាក្រក់ពីស្ថានភាពប្រែប្រួល ជាអវិជ្ជមានប្រកបដោយហានិភ័យខ្ពស់បណ្ដាមកពីគ្រឿងញៀន។ បញ្ហានេះ គឺដោយសារតែការកើនឡើងឥតឈប់ឈរ នៃការផលិតការចរាចរ និងការជួញដូរគ្រឿងញៀននៅលើពិភពលោក និងក្នុងតំបន់។
ជាក់ស្ដែងទោះបីចំនួនករណីគ្រឿងញៀនសមត្ថកិច្ចបង្ក្រាបបានមានការថយចុះ ប៉ុន្តែករណីបង្ក្រាបបទល្មើសគ្រឿងញៀនធំៗ បានកើនឡើង ដោយមានគ្រឿងញៀនសរុបប្រមាណ៨០ តោន រួមទាំងម៉ាស៊ីនផលិតកែច្នៃស្វ័យប្រវត្តិឈុតធំៗដ៏គ្រោះថ្នាក់ជាច្រើនទៀត នៅរាជធានីភ្នំពេញ និងបណ្ដាខេត្តមានភូមិសាស្រ្តជាប់រាជធានី ជាប់ព្រំដែនឡាវ ថៃ និងវៀតណាម នៅតាមប្រៃសណីយ៍ និងនៅលើផ្ទៃសមុទ្រជាដើមនោះ។
សម្តេចក្រឡាហោម ស ខេង បានលើកឡើងទៀតថា កាលពីឆ្នាំ២០២១ ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ អាជ្ញាធរបានបង្ក្រាបប្រតិបត្តិការបទល្មើសគ្រឿងញៀនសរុបចំនួន ៦.៣០៨ករណី។ ក្នុងចំណោមករណីជួញដូរ ៤,៤៧៣ករណី, ប្រើប្រាស់ ១,៧៨៩ករណី, ដាំដុះ ៣៧ករណី, ករណីកែច្នៃ ៩ករណី និងឃាត់ខ្លួនជនសង្ស័យចំនួន ១៣,៩៧៩នាក់ ក្នុងនោះ ជនសង្ស័យ ៨,៦៧២នាក់ ជាមុខសញ្ញាជួញដូរ, ប្រើប្រាស់គ្រឿងញៀន ៥,២៦៤នាក់, ដាំដុះ ៩នាក់ និងកែច្នៃ ៣៤នាក់”។ ជនសង្ស័យត្រូវ បានបញ្ជូនទៅកាន់តុលាការរាជធានី-ខេត្តផងដែរ សរុបរថយន្ត១៣៨គ្រឿង ម៉ូតូ១.៩៨៨គ្រឿង ទូរស័ព្ទ៦.៥៥៤គ្រឿង ជញ្ជីង៣៨៥ អាវុធ៥០ដើម និងអាវុធធុនតូច២៩ដើម។
សម្តេច បានបញ្ជាក់ផងដែរថា «ថ្វីដ្បិតនាពេលនេះបញ្ហាគ្រឿងញៀននៅមិនទាន់មានការថមថយ ប៉ុន្តែវាទំនងជាអាចដើរដល់ទីបញ្ចប់នៅថ្ងៃណាមួយមិនខានឡើយ ប៉ុន្តែបញ្ហាគ្រឿងញៀននេះ វានឹងមិនងាយរកទីបញ្ចប់ឃើញនោះទេ ដោយសារក្រុមឧក្រិដ្ឋជននៅតែបន្តរិះរកវិធីសាស្ត្រថ្មីៗដើម្បីផលិត និងចែកចាយ«។
កាលពីដើមឆ្នាំ២០២១ រាជរដ្ឋាភិបាលកម្ពុជាដែលមានសម្ដេចតេជោជាប្រមុខ បានបន្តយកចិត្តទុកដាក់ចង្អុលបង្ហាញលើការងារប្រយុទ្ធប្រឆាំងគ្រឿងញៀននេះណាស់ ពិសេសសម្ដេចបានឯកភាពកែសម្រួលលក្ខណៈសម្បត្តិនៃគោលនយោបាយ «ភូមិ ឃុំសង្កាត់ មានសុវត្ថិភាព» ដោយលើកជាកម្រិតគោលនយោបាយ និងបានបន្តដាក់បញ្ចូលបញ្ហាគ្រឿងញៀនជាកិច្ចការអាទិភាព ។
យ៉ាងណាក៏ដោយសម្តេចប្រមុខក្រសួងមហាផ្ទៃរូបនេះ បានអំពាវនាវជាថ្មីម្តងទៀត ដល់កងកម្លាំងអនុវត្តច្បាប់ និងប្រជាពលរដ្ឋទាំងអស់ ចូលរួមអនុវត្តន៍តាមទិសស្លោកប្រយុទ្ធប្រឆាំងគ្រឿងញៀន បីកុំ មួយរាយការណ៍ ដូចជាកុំពាក់ព័ន្ធ ៖ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន។ កុំអន្តរាគមន៍ ៖ កុំរារាំងការរអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫ មិត្តភក្កិក៏ដោយ។ កុំលើកលែង ៖ កុំបន្ធូរបន្ថយការអនុត្តច្បាប់ចំពោះឧក្រិដ្ឌជនគ្រឿងញៀន។
សមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវៈរបស់ខ្លួន ហើយជនគ្រប់រូបត្រូវគោរព និងអនុវត្តច្បាប់។ មួយរាយការណ៍៖ ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ចជាដើមនោះ៕
