29 
(ភ្នំពេញ)៖ ក្រុមបាល់ទាត់សមាជិកពានរង្វាន់សម្ដេចតេជោ ហ៊ុន សែន-ថ្នាក់ខេត្ត គឺក្រុមអធិរាជដំរីឦសាន បានបង្ហាញគំរូប្លង់លក្ខណៈ 3D ដើម្បីត្រៀមសាងសង់ទីលានផ្ទាល់ខ្លួន ដែលមានលក្ខណៈស្ដង់ដារសហព័ន្ធកីឡាបាល់ទាត់ទ្វីបអាស៊ី (AFC) លើកដំបូងនៅក្រុងបានលុង ខេត្តរតនគិរី នាពេលឆាប់ៗខាងមុខ។
លោក អ៊ួន ឧត្តម អគ្គលេខាធិការក្លិបអធិរាជដំរីឦសាន បានឲ្យដឹងថា គម្រោងសាងសង់ទីលានស្ដង់ដារ AFC ខាងលើ គឺមានទីតាំងស្ថិតនៅខាងក្រោយជើងភ្នំស្វាយ នាភូមិ៣ សង្កាត់កាចាញ ក្រុងបានលុង គ្រាដែលដី គឺទទួលបានការសហការ និងឧបត្ថម្ភពីក្រុមការងារក្លិប ដែលមានទំហំដីប្រមាណជាង ២ហិចតា។
អគ្គលេខាធិការក្លិបដដែលបានបញ្ជាក់ថា ដោយសារបញ្ហាកូវីដ-១៩ ក្លិបបានបែងចែកការសាងសង់ទីលាននេះជាដំណាក់កាល ដោយចាប់ផ្ដើមពីការឈូសឆាយឲ្យចេញជារូបរាងសិន បន្ទាប់មកអាចចុងឆ្នាំ ឬដើមឆ្នាំក្រោយ ទើបក្លិបធ្វើការដាំស្មៅ និងធ្វើវេទិការមួយ មុនឈានដល់ការសាងសង់កន្លែងអង្គុយជាបន្ដបន្ទាប់។
ចំពោះគោលដៅសំខាន់នៃការសាងសង់ទីលានស្ដង់ដារ AFC លើទឹកដីក្រុងបានលុងនេះ ទី១-ដើម្បីប្រែក្លាយតំបន់ជើងភ្នំស្វាយឲ្យក្លាយជាទីលានបៃតងមួយ ដើម្បីរួមចំណែកទាក់ទាញ និងទទួលភ្ញៀវទេសចរនាថ្ងៃអនាគត និងទី២-ដើម្បីចូលរួមបណ្ដុះបណ្ដាល និងអភិវឌ្ឍយុវជន ក្នុងន័យរួមចំណែកអភិវឌ្ឍវិស័យកីឡាបាល់ទាត់កម្ពុជាឲ្យកាន់តែរីកចម្រើន។
ក្រោយការបង្ហាញគំរូប្លង់លក្ខណៈ 3D គេឃើញមានមហាជន និងអ្នកគាំទ្រជាច្រើន ពិសេសអ្នកខេត្តរតនគិរី បានបង្ហាញការពេញចិត្ត និងមានមោទនភាព ចំពោះផែនការសាងសង់ទីលានស្ដង់ដារអន្ដរជាតិ នៅខេត្តភូមិភាគឦសាននៃប្រទេសកម្ពុជានេះ ហើយគេរំពឹងថា ក្រោយសាងសង់រួច ទីលានរបស់ក្លិបអធិរាជដំរីឦសាន នឹងក្លាយជាផ្នែកមួយ ជំរុញវិស័យបាល់ទាត់ក្នុងខេត្តនេះឲ្យកាន់តែរីកចម្រើន ក៏ដូចជាលើកកម្ពស់ផ្នែកវិស័យទេសចរណ៍ផងដែរ។
សូមបញ្ជាក់ថា ក្រុមអធិរាជដំរីឦសានខេត្តរតនគិរី បានចូលរួមប្រកួតប្រជែងពានរង្វាន់សម្ដេចតេជោ ហ៊ុន សែន-ថ្នាក់ខេត្ត លើកដំបូងកាលពីឆ្នាំ២០១៩ ខណៈពេលនោះ ពួកគេទទួលបានចំណាតថ្នាក់លេខ៣ ប្រចាំពានថ្នាក់ខេត្ត ប៉ុន្ដែឆ្នាំ២០២០ ក្រុមមកពីខេត្តទល់ដែនឡាវ និងវៀតណាមមួយនេះ បានធ្លាក់ត្រឹមវគ្គចែកពូល។ ចំណែកឆ្នាំ២០២១ ពួកគេប្រកួតក្នុងពូល F ជាមួយខេត្តត្បូងឃ្មុំ និងព្រះវិហារ ប៉ុន្ដែដោយសារបញ្ហាកូវីដ បច្ចុប្បន្នពួកគេបានដកខ្លួនពីការប្រកួតទៅហើយ៕
