25 
ស៊ីហ្គេម៖ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) នឹងរៀបចំការប្រកួតរចនា ឬឌីហ្សាញភ្លើងគប់ និងមេដាយស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នាខែក្រោយ។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC កាលពីថ្មីៗ។
ឯកឧត្ដម វ៉ាត់ ចំរើន បានអំពាវនាវដល់មហាជន យុវជន-យុវនារីដែលមានសមត្ថភាព និងទេពកោសល្យត្រៀមខ្លួនចូលរួមប្រកួតប្រជែងស្នាដៃ តាមរយៈការរចនានូវភ្លើងគប់ និងមេដាយ ដែលជាសមិទ្ធផលប្រវត្តិសាស្ដ្រមួយ សម្រាប់ប្រើប្រាស់ក្នុងព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជា។ ចំពោះការប្រកួតនឹងធ្វើឡើងដោយបើកទូលាយ ដូចការប្រឡងប្រជែងការរចនាស្លាកសញ្ញា (Logo) និងនិមិត្តសញ្ញា (Mascot) ស៊ីហ្គេម-អាស៊ានប៉ារ៉ាហ្គេមកាលពីពេលកន្លងទៅដែរ ហើយសម្រាប់អ្នកទទួលបានជ័យលាភីនឹងទទួលបានរង្វាន់ និងអត្ថប្រយោជន៍ជាច្រើនពីគណៈកម្មាធិការជាតិ CAMSOC ទៀតផង។ នេះបើតាមការបន្ថែមរបស់ឯកឧត្តម វ៉ាត់ ចំរើន។ គួរដឹងថា CAMSOC ធ្លាប់រៀបចំការប្រកួតប្រជែងជាសាធារណៈ នូវការរចនាស្លាកសញ្ញា និងនិមិត្តសញ្ញាម្ដងរួចមកហើយ ដោយម្ចាស់ជ័យលាភីត្រូវបានប្រកាស និងប្រគល់ប្រាក់រង្វាន់ក្នុងពិធីរាប់ថយក្រោយ ១,០០០ថ្ងៃនៃដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ ក្រោមអធិបតីដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC កាលពីថ្ងៃទី៧ ខែសីហា ឆ្នាំ២០២០ នៅពហុកីឡដ្ឋានជាតិមរតកតេជោ។
ចំពោះបេក្ខជនជ័យលាភីទាំងពីររូបគឺមានលោក នាង វិសាល ដែលជាម្ចាស់ជ័យលាភីស្លាកសញ្ញា (Logo) និងម្ចាស់ជ័យលាភីនិមិត្តសញ្ញា (Mascot) បានទៅលើកញ្ញា លី គឹមអាន។ បេក្ខជនជ័យលាភីទាំង ២រូបបានទទួលបានប្រាក់រង្វាន់លើកទឹកចិត្តក្នុងម្នាក់ៗ ២០លានរៀល ហើយទទួលបានសិទ្ធិជាអគ្គរដ្ឋទូតសុឆន្ទៈ “Good Will Games Ambassador” SEA Games 2023, ទទួលបានសិទ្ធិទស្សនាការប្រកួតគ្រប់ប្រភេទកីឡា និងពិធីបើក-បិទ SEA Games 2023 ព្រមទាំងបានចុះឈ្មោះក្នុងបញ្ជីមរតក SEA Games Legacy ផងដែរ៕
