34 (តាកែវ)៖ កម្លាំងកងរាជអាវុធហត្ថខេត្តតាកែវ បានសហការជាមួយកងកម្លាំងលើផ្ទៃប្រទេស បានចុះឃាត់ខ្លួនជនសង្ស័យចំនួន២នាក់ នៅក្នុងខេត្តតាកែវ និងម្នាក់ទៀតនៅរាជធានីភ្នំពេញ ដោយរឹបអូសបានវត្ថុតាងជាថ្នាំញៀនជិត៦គីឡូក្រាម ព្រមទាំងដកហូតបានវត្ថុតាងមួយចំនួនធំ។
បើយោងតាមលោកឧត្តមសេនីយ៍ត្រី ឡា ឡៃ មេបញ្ជាការកងរាជអាវុធហត្ថខេត្តតាកែវ បានឱ្យដឹងថា មន្រ្តីការរិយាល័យគ្រឿងញៀន របស់អាវុធហត្ថខេត្តតាកែវ កាលយប់ថ្ងៃទី២២ ខែមីនា ឆ្នាំ២០២១ បានចុះបង្ក្រាបករណីជួញដូរគ្រឿងញៀន នៅត្រង់ចំណុចភូមិពេជចង្វារ ឃុំបឹងត្រាញ់ខាងជើង ស្រុកសំរោង ខេត្តតាកែវ ដោយឃាត់ខ្លួនជនសង្ស័យបានម្នាក់ ឈ្មោះ ចែម គីមស្រ៊ុន ភេទប្រុស អាយុ ២៧ឆ្នាំ រស់នៅកន្លែងកើតហេតុ និងដកហូតវត្ថុតាងម្សៅក្រាមពណ៌សថ្លា (សង្ស័យគ្រឿងញៀន) បានចំនួន០១កញ្ចប់ ទម្ងន់ ២៥,៩១ក្រាម ទូរស័ព្ទចំនួន ០១គ្រឿង។
លោកឧត្តមសេនីយ៍ត្រី ឡា ឡៃ បានបន្តថា ក្រោយពីស្ដាប់ចម្លើយជនសង្ស័យខាងលើបានសារភាពថាខ្លួន ជាអ្នកដឹកជញ្ជូនគ្រឿងញៀនពីនារីម្នាក់នៅម្ដុំផ្លូវបេតុង ស្ថិតក្នុងភូមិព្រៃព្រីងខាងជើង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ និងដោយបានការអនុញ្ញាតពីលោក ជីវ ចាន់តារា ព្រះរាជអាជ្ញាអមសាលាដំបូង ខេត្តតាកែវ ក៏បានធ្វើការពន្លាតដែនសមត្ថកិច្ច ទៅរាជធានីភ្នំពេញ ដឹកនាំបញ្ជារួមដោយលោកវរសេនីយ៍ឯក ង៉ែត ចាន់ធី មេបញ្ជាការរងទទួលផែនស្រាវជ្រាវ និងបង្ក្រាបបទល្មើស សហការជាមួយការិយាល័យប្រឆាំងគ្រឿងញៀន កងរាជអាវុធហត្ថលើផ្ទៃប្រទេស និងការិយាល័យប្រឆាំងគ្រឿងញៀន កងរាជអាវុធហត្ថរាជធានីភ្នំពេញ ដឹកនាំដោយលោកឧត្តមសេនីយ៍ត្រី អ៊ុង ដេប៉ូ ស្នងការរងស្រាវជ្រាវ និងបង្ក្រាបបទល្មើស ដោយបានការអនុញ្ញាតពីលោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ
ចំពោះលទ្ធផលបង្ក្រាបទីតាំងទី២ សមត្ថកិច្ចចម្រុះឃាត់ខ្លួនជនសង្ស័យម្នាក់ឈ្មោះ ហេង ច្រឹប ភេទស្រី អាយុ៣១ឆ្នាំ ជនជាតិខ្មែរ ស្នាក់នៅផ្ទះជួលភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ និងដកហូតបានបានម្សៅក្រាមពណ៌សថ្លា (ICE) ចំនួន០៥កញ្ចប់ ទម្ងន់ប្រហែល៥០០ក្រាម, ម៉ូតូចំនួន០១គ្រឿង ម៉ាកឃ្លីក ពណ៌សលាយទឹកក្រូច ពាក់ស្លាកលេខ PP-1IR-4377 ភ្នំពេញ។
និងបន្តទៅឆែកឆេរផ្ទះជួលរបស់ជនសង្ស័យឈ្មោះ ហេង ច្រឹប នៅវេលាម៉ោង១៥៖៤០នាទី ទទួលបានលទ្ធផលដកហូតបានម្សៅក្រាមពណ៌សថ្លា (ICE) ចំនួន០៥ដុំធំ ទម្ងន់ប្រហែល ៥គីឡូក្រាម, ស្លាកលេខរថយន្តចំនួន០៦ ស្មើនឹង០៣រថយន្តគ្រឿង នៅចំពោះមុខជនសង្ស័យបានទទួលស្គាល់វត្ថុតាងខាងលើពិតជារបស់ខ្លួនប្រាកដមែន។
បើតាមលោកមេបញ្ជាការកងរាជអាវុធហត្ថខេត្តតាកែវ បច្ចុប្បន្នជនសង្ស័យរួមនឹងវត្ថុតាង ត្រូវការិយាល័យជំនាញអាវុធហត្ថខេត្ត កសាងសំណុំរឿងដើម្បីចាត់ការតាមនីតិវិធីច្បាប់៕
