44 
ខណ្ឌទួលគោក៖ បន្ទាប់ពីទទួលបានព័ត៌មានពីលោក រក្សា អ្នកយកព័ត៌មានប្រចាំអង្គភាពសារព័ត៌មាន KNN news តាមTelegram កាលពីថ្ងៃទី០៤ ខែមីនា ឆ្នាំ ២០២១ ថានៅផ្លូវ១៣៨ ផ្ទះលេខ១៦៣ សង្កាត់ទឹកល្អក់១ ខណ្ឌទួកគោក រាជធានីភ្នំពេញ សង្ស័យថាមានអ្នកលួចកត់ឆ្នោតវៀតណាមខុសច្បាប់ លោក ឯក ឃុនដឿន អភិបាលនៃគណៈអភិបាលខណ្ឌទួលគោក រាជធានីភ្នំពេញ បញ្ជារទៅលោក ប៉ិច សុខឃឿន ចៅសង្កាត់ទឹកល្អក់១ រួមទាំងមន្ត្រីប៉ុស្តិ៍ចុះទៅបង្ក្រាបភ្លាម តែលោកចៅសង្កាត់រូបនេះទំនងជាត្រូវរូវគ្នាជាមួយម្ចាស់ទីតាំងខាងលើ គ្រាន់តែទៅខ្សិបឲ្យបិតទ្វារបណ្តោះ អាសន្ន។
ទីតាំងកត់ឆ្នោតខាងលើបិតទ្វារបានតែ ២ ម៉ោង ទ្រាំមិនបានបើកដំណើរការវិញយ៉ាងរលូន លោក រក្សា ក៍ ផ្តល់ព័ត៌មានទៅលោក ឯក ឃុនដឿន ម្តងទៀតរួមជាមួយកន្ទុយលេខឆ្នោតវៀតណាម លោកអភិបាលខណ្ឌទួលគោក ក៍ បញ្ជារទៅលោក ប៉ិច សុខឃឿន ចៅសង្កាត់ម្តងទៀត។
លោក ប៉ិច សុខឃឿន ចៅសង្កាត់ទឹកល្អក់១ បានទទួលបញ្ជារយ៉ាងមុឺងមាត់ក៍ចុះទៅបង្ក្រាបតាមបទបញ្ជារតែលោកមិនបានចុះទៅបង្ក្រាបទីតាំងខាងលើនោះទេ បែជាចុះទៅបង្ក្រាបទីតាំងផ្សេងដែលលួចបង្កប់ចាក់ឆ្នោតវៀតណាមហើយរាយការណ៍ទៅលោក ឯក ឃុនដឿន ថាបានបង្ក្រាបរួចរាល់តាមបទបញ្ជារ។
ទីតាំងកត់ឆ្នោតខាងលើដែលសង្ស័យបង្កប់ឆ្នោតវៀតណាមបិតទ្វារបានតែមួយថ្ងៃកន្លះទេបន្ទាប់ពីមានអ្នកខ្សិបឲ្យបិតទ្វារសិនទៅចាំមើលសភាពការណ៍ថ្នាក់លើស្ងប់ស្ងាត់ចាំបើកបន្តរ។
នេះបើយោងតាមប្រភពពីអ្នកលក់កាហ្វេនៅក្បែរទីតាំងកត់ឆ្នោតខាងលើ បានខ្សិបប្រាប់ថាទីតាំងកត់ឆ្នោតវៀតណាមមានច្រើនរាប់មិនអស់ក្នុងសង្កាត់ទឹកល្អក់១ តែទីតាំងនៅផ្លូវ១៣៨ ផ្ទះលេខ១៦៣ នេះបើកទទួលចាក់ច្រើនៗណាស់ក្នុងមួយថ្ងៃទទួលបានប្រាក់រាប់សិបលានរៀល ហើយមិនដែលមានប៉ូលិសណាចុះមកបង្ក្រាបទេគឺមានសុវត្ថិភាពតែម្តង។
ជាក់ស្តែងណាស់កាលពីរសៀលថ្ងៃទី០៤ខែមីនាឆ្នាំ២០២១លោក ប៉ិច សុខឃឿន ចៅសង្កាត់ទឹកល្អក់១ ដឹកនាំកម្លាំងប៉ុស្តិ៍ចុះទៅបង្ក្រាបបិទមួយទីតាំងនៅខាងលិចផ្ទះចាក់ឆ្នោតខាងលើ ចំណែកផ្ទះលេខ ១៦៣ ដែលសង្ស័យកត់ឆ្នោតវៀតណាម ក៍បើកដំណើរការឡើងវិញនៅថ្ងៃទី ០៦ ខែមីនា ឆ្នាំ២០២១ បានយ៉ាងរលូន។ អត្ថបទ នាយភ្លុក ចេញផ្សាយថ្ងៃទី០៦ខែមីនាឆ្នាំ២០២១
