51 
ភ្នំពេញ៖ វ៉ាក់សាំងបង្ការកូវីដ១៩ ប្រភេទវ៉ាក់សាំងអាស្ត្រាហ្សឺណិកា (Astra Zeneca/SII) ចំនួន ៣២៤.០០០ដូស ដែលបានទទួលអាជ្ញាប័ណ្ណផលិត ដោយវិទ្យាស្ថានសេរ៉ុមនៃប្រទេសឥណ្ឌា ជាជំនួយរបស់អង្គការសុខភាពពិភពលោកនឹងមកដល់កម្ពុជានៅថ្ងៃទី០២ ខែមីនា ឆ្នាំ២០២១ខាងមុខនេះ។ នេះបើយោងតាមសេចក្តីជូនព័ត៌មានរបស់ក្រសួងសុខាភិបាល អង្គការសុខភាពពិភពលោក និងអង្គការយូនីសែហ្វប្រចាំនៅកម្ពុជា ។
សេចក្តីជូនព័ត៌មានបានបញ្ជាក់ថា បើមិនមានការប្រែប្រួលទេនៅយប់ម៉ោង ១៩និង៥០នាទីយប់ថ្ងៃទី០២ ខែមីនា ឆ្នាំ២០២១ ខាងមុខ វ៉ាក់សាំងបង្ការកូវីដ១៩ ជាជំនួយដំណាក់កាលដំបូង របស់អង្គការសុខភាពពិភពលោកចំនួន ៣២៤០០០ដូសនេះ នឹងមកដល់អាកាសយានដ្ឋានអន្តរជាតិភ្នំពេញ នៃព្រះរាជាណាចក្រកម្ពុជា។ វ៉ាក់សាំងដែលនឹងមកដល់ក្នុងពេលឆាប់ៗខាងមុខនេះ ជាចំនួនវ៉ាក់សាំងលើកដំបូងដែលផ្តល់ជាជំនួយឲ្យកម្ពុជា ពីមជ្ឈមណ្ឌលកូវ៉ាក់ ( COVAX Facility) ហើយវ៉ាក់សាំងក្នុងបរិមាណដទៃទៀត នឹងបន្តដឹកជញ្ជូនមកកម្ពុជាបន្តបន្ទាប់ នៅពេលក្រោយទៀតជាដំណាក់ៗនៅក្នុងឆ្នាំ២០២១នេះ។ មជ្ឈមណ្ឌលកូវ៉ាក់ គឺជាកិច្ចខិតខំប្រឹងប្រែងសកលដែលពុំធ្លាប់មានពីមុនមក ដើម្បីជួយសម្របសម្រួលផ្តល់ឲ្យ ប្រទេសទាំងអស់នៅក្នុងពិភពលោក នូវសមភាពទទួលបានវ៉ាក់សាំងប្រកបដោយសុវត្ថិភាព ដើម្បីការពារជំងឺកូវីដ១៩ ឲ្យបានឆាប់តាមដែលអាចធ្វើទៅបាន។
មជ្ឈមណ្ឌលកូវ៉ាក់នេះដឹកនាំដោយអង្គការ GAVI, CEPI និងអង្គការសុខភាពពិភពលោក (WHO) ក្នុងភាពជាដៃគូជាមួយនឹងអង្គការយូនីសេហ្វ ហើយកម្ពុជាគឺជាប្រទេសមួយ ដែលស្ថិតក្នុងចំណោមប្រទសដំបូងគេ នៅក្នុងតំបន់អាស៊ីប៉ាស៊ីហ្វិកខាងលិច ដែលទទួលបានវ៉ាក់សាំងពីមជ្ឈមណ្ឌលកូវ៉ាក់ (COVAX Facility)។ សូមបញ្ជាក់ថា ដោយមានការអនុញ្ញាតដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្ត្រី ឯកឧត្ដមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ជាតំណាងរាជរដ្ឋាភិបាលកម្ពុជា នឹងចូលរួមក្នុងពិធីប្រគល់-ទទួលនៅអាកាសយានដ្ឋានអន្តរជាតិភ្នំពេញ ដោយមានការប្រគល់ពីសំណាក់លោកស្រីវេជ្ជបណ្ឌិត លី អាយលែន តំណាងអង្គការសុខភាពពិភពលោកប្រចាំនៅកម្ពុជា និងលោកស្រី ហ្វូរុក ហ្វូយូហ្សាត តំណាងអង្គការយូនីសេហ្វប្រចាំកម្ពុជាផងដែរ៕
