ក្រសួងសុខាភិបាល ច្រានចោលព័ត៌មានផ្សាយបំពុលសង្គមថា អ្នកគ្រូបង្រៀនម្នាក់ស្លាប់ដោយសារ ចាក់វ៉ាក់សាំងកូវីដ១៩

(ភ្នំពេញ)៖ លោកជំទាវ ឱ វណ្ណឌីន រដ្ឋលេខាធិការ និងអ្នកនាំពាក្យក្រសួងសុខាភិបាល បានចេញមកច្រានចោលចំពោះការផ្សាយបំពុលខុសពីការពិតថា អ្នកគ្រូបង្រៀនម្នាក់ស្លាប់ដោយសារចាក់វ៉ាក់សាំងកូវីដ១៩។
ការចេញមកច្រានចោលនេះ បន្ទាប់ពីបុគ្គល ឈ្មោះ សឺន ហាយ ដែលមានគណនីFB ឈ្មោះ Hai KhmerKromជាខ្មែរក្រោម ដែលរត់ចេញពីកម្ពុជាទៅនៅក្រៅប្រទេសកាលពីប៉ុន្មានឆ្នាំមុន បានបង្ហោះលើទំព័រហ្វេសប៊ុកថា
សូមប្រជាជនខ្មែរធ្វើការពិចារណាមុននឹងចាក់វ៉ាក់សាំងចិន
” អ្នកគ្រូទទួលមរណៈភាពហើយ ” 17/02/2021
អ្នកគ្រូស្លូត សុភាព ជាជនគំរូ បង្រៀនសិស្សយ៉ាងល្អ បែរជាទទួលមរណភាពដោយសារចាក់វ៉ាក់សាំងបង្ការ ជម្ងឺកូវិដ Sinnorfarm របស់ចិនបាន២ថ្ងៃ ។ ជាការបាត់បង់ធនធានមនុស្ស ដ៏សំខាន់ ផ្នែកបណ្ដុះបណ្ដាល ។
( អ្នកគ្រូ ឆន ណារី អាយុ21ឆ្នាំ នៅខេត្តក្រចេះ )
គួរឲ្យសោកស្តាយពន់ពេកហើយ
លោកជំទាវ ឱ វណ្ណឌីន បានគូសបញ្ជាក់ថា រហូតមកដល់ថ្ងៃទី១៧ ខែកុម្ភៈ ឆ្នាំ២០២១នេះ ការចាក់វ៉ាក់សាំងកូវីដ១៩ មិនទាន់មានគ្រូបង្រៀនណាម្នាក់ចាក់នៅឡើយនោះទេ។
លោកជំទាវ ឱ វណ្ណឌីន បានអំពាវនាវឱ្យអាជ្ញាធរចាត់វិធានការតាមផ្លូវច្បាប់ចំពោះជនផ្សព្វផ្សាយព័ត៌មានបំពុលនេះផងដែរ។
សូមបញ្ជាក់ថា កញ្ញា ឆន ណារី អាយុ ២១ឆ្នាំ ជាគ្រូបង្រៀននៅខេត្តក្រចេះ។ អ្នកគ្រូបានទទួលមរណភាពដោយសារតែរលាកស្រោមខួរ៕