55 
ភ្នំពេញ: បន្ទាប់ធ្វើការចាក់ខ្លួនឯងផ្ទាល់ ហើយក៏ជាដំណក់ថ្នាំ និងម្ជុលដំបូងនៃការចាក់វ៉ាក់សាំងការពារមេរោគកូវីដ ១៩ នៅព្រឹកថ្ងៃទី១០ ខែកុម្ភៈ ឆ្នាំ២០២១នេះ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក បានធ្វើការអំពាវនាវដល់ជនរួមជាតិទាំងអស់ ឲ្យត្រៀមលក្ខណៈចូលរួមជាមួយរាជរដ្ឋាភិបាលទៅទទួលការចាក់វ៉ាក់សាំង ការពារមេរោគកូវីដ១៩ឲ្យបានគ្រប់ៗគ្នានាពេលខាងមុខនេះ។
ថ្លែងតាមរយៈសង្គមហ្វេសបុក ឯកឧត្តមហ៊ុន ម៉ាណែទ បានលើកឡើងថា« ខ្ញុំបានចាក់វ៉ាក់សាំងការពារកូវីដ-១៩ រួចហើយ…សូមបងប្អូនខ្មែររួមគ្នា និងត្រៀមលក្ខណៈចូលរួមជាមួយរដ្ឋាភិបាលអនុវត្តវិធានការសុខាភិបាល និងទទួលចាក់ថ្នាំបង្ការទៅតាមដំណាក់កាលនីមួយៗ តាមផែនការលទ្ធភាពរបស់រាជរដ្ឋាភិបាល ដើម្បីការពារខ្លួនយើង គ្រួសារយើង សង្គមជាតិយើង និងប្រជាជនយើងនៅក្នុងកាលៈទេសៈដ៏លំបាកនេះ ពីព្រោះការប្រយុទ្ធប្រឆាំងនឹងជំងឺកូវីដ-១៩ គឺផ្តើមចេញពីខ្លួនយើង ដើម្បីការពារខ្លួនយើង និងអ្នកដទៃ»។
ឯកឧត្តមឧត្តមសេនីយ៍ឯក ហ៊ុន ម៉ាណែត គឺជាបុត្រច្បងរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានធ្វើការចាក់នូវវ៉ាក់សាំងនៃដូសដំបូង និងម្ជុលដំបូងគេបង្អស់ ហើយបន្ទាប់មកមានបុត្រប្រុសបង្កើតរបស់ម្តេចចំនួនពីរនាក់ និងកូនប្រសារប្រុសសម្តេចចំនួនចំនួនពីរនាក់ទៀត រួមទាំងឥស្សរជនខ្មែរជាច្រើនទៀតដែលបានទទួលការចាក់វ៉ាក់សាំងការពារមេរោគកូវិដ១៩ នៅកន្លែងដាច់ដោយឡែកពីគ្នានាថ្ងៃទី១០ ខែកុម្ភៈនេះ។
ក្នុងព្រឹត្តិការណ៍នៃការចាក់វ់ាក់សាំង បង្ការមេរោគកូវីដ១៩ ដោយស្ម័គ្រចិត្តនេះ សម្តេចតេជោ ហ៊ុន សែន ក៏បានផ្ញើសារតាមរយៈផេកហ្វេសបុកផ្ទាល់សម្តេចផងដែរ ដោយសម្តេចតេជោ បានលើកឡើងថា ទីបំផុតប្រទេសកម្ពុជាបានចាប់ផ្តើមដំណើរការជាផ្លូវការនូវការចាក់វ៉ាក់សាំង ជូនប្រជាជនរបស់ខ្លួន ហើយ។ នេះជាផ្លែផ្កានៃកិច្ចសហប្រតិបត្តិការរវាងកម្ពុជា ចិន ដែលជាមិត្តដែកថែបដែលខ្ញុំសុំយកឱកាសនេះថ្លែងអំណរគុណចំពោះបក្ស រដ្ឋ កងទ័ព និងប្រជាជនចិន ពិសេស ឯកឧត្តមប្រធានាធិបតី ស៊ី ជិនភីង ដែលបានផ្តល់ជំនួយដ៏សប្បុរសដល់ប្រជាជនកម្ពុជា។
ជាមួយគ្នានោះសម្តេចតេជោ ហ៊ុន សែន ក៏បានបញ្ជាក់ផងដែរថា «មុនចាក់វ៉ាក់សាំង មានការលើកឡើងមួយចំនួនជុំវិញអវត្តមានរបស់ខ្ញុំលើការចាក់វ៉ាក់សាំងនាថ្ងៃនេះ បណ្តាលមកពីកត្តាអាយុរបស់ខ្ញុំរហូតប្រើពាក្យមិនសមរម្យខ្លះមកលើខ្ញុំ។ ច្បាស់ណាស់ថ្ងៃនេះកូនប្រុសរបស់ខ្ញុំបានទទួលវ៉ាក់សាំងមុនគេជំនួសអោយឪពុក ដែលនេះក៏បញ្ជាក់ច្បាស់ពីការទទួលខុស ត្រូវរបស់យើងចំពោះមុខជនរួមជាតិយើង»។
តាមរយៈហ្វេសបុកនេះដែរ សម្តេចតេជោ ហ៊ុន សែន ក៏បានអំពាវនាវ និងផ្តាំផ្ញើដល់ជនរួមជាតិទាំងអស់ កុំបារម្ភលើវ៉ាក់សាំងមកពីប្រទេសណា? ម៉ាកអ្វី?តែគប្បីបារម្ភពីការអត់វ៉ាក់សាំងចាក់ព្រោះគ្មានវ៉ាក់សាំងលក់តាមផ្សារដូចលក់ត្រី លក់ត្រកួននោះទេ។ បងប្អូនខ្មែរយើងដែលរស់នៅប្រទេសជឿនលឿនមួយចំនួនធំឬអាចដល់៩៨ភាគរយមិនទាន់បានទទួលការចាក់វ៉ាក់សាំងនៅឡើយ ព្រោះវាអត់មានវ៉ាក់សាំង បើទោះបីប្រទេសនោះមានលុយហើយក៏រកទិញវ៉ាក់សាំងមិនបានដោយសារការផលិតមិនទាន់នោះ៕
