51 បាល់ទាត់៖ ក្រុមបិសាចក្រហម Manchester United បានទំលាក់ក្រុមហង្សក្រហម Liverpool ចេញពីការប្រកួតពានរង្វាន់ FA Cup ជាលើកទី១០ ក្នុងប្រវត្តិសាស្ត្រ ក្រោយវាយបកយកឈ្នះនៅ Old Trafford ៣–២។ Mohamed Salah បើកការនាំមុខមុនអោយ Liverpool នៅនាទីទី១៨ មុនពេលដែល Mason Greenwood តាមស្មើវិញនៅនាទីទី២៦។
ឈានចូលវគ្គទី២ Marcus Rashford រកបានគ្រាប់នាំមុខលើកដំបូងនៅនាទីទី៤៨ ឲ្យ Manchester United តែខ្សែប្រយុទ្ធអេស៊ីប Mohamed Salah ដដែលរកគ្រាប់តាមស្មើវិញបាននៅនាទីទី៥៨។ ខ្សែបំរើព័រទុយហ្កាល់ Bruno Fernandes គឺជាអ្នកសំរេចជោគវាសនា Manchester United ឡើងជុំទី៥ FA Cup ក្រោយស៊ុតបាល់ Freekick នៅនាទីទី៧៨។ ជ័យជំនះនេះធ្វើឲ្យ Manchester United ឡើងជុំទី៥ FA Cup និងជាលើកទី១០ ដែលទំលាក់ Liverpool ក្នុងប្រវត្តិសាស្ត្រ FA Cup។ ប្រកួតបន្ទាប់របស់ Manchester United ត្រូវទទួល Sheffield United នៅ Premier League ថ្ងៃពុធនេះ ខណៈ Liverpool ទៅផ្ទះ Spurs ថ្ងៃព្រហស្បតិ៍។
លទ្ធផលផ្សេងទៀតយប់មិញ Chelsea យកឈ្នះ Luton Town ៣–០ ដោយគ្រាប់បាល់ ៣គ្រាប់ម្នាក់ឯងរបស់ Tammy Abraham ខណៈ Leicester City ឈ្នះនៅផ្ទះ Brentford ៣–១ និង Everton យកឈ្នះ Sheffield United ៣–០។ ដោយឡែកលទ្ធផលកាលពីថ្ងៃសៅរ៍ Arsenal បានធ្លាក់ចេញពី FA Cup ត្រឹមជុំទី៤ ក្រោយចាញ់នៅទឹកដី Southampton ១–០៕
