31 អ៊ីរ៉ាក់៖ ក្រុមរដ្ឋអ៊ីស្លាមបានអះអាងទទួលខុសត្រូវ ចំពោះការបំផ្ទុះគ្រាប់បែកអត្តឃាតចំនួន ២ផ្ទួនៗគ្នាដែលបានសម្លាប់មនុស្ស ៣២នាក់ និងចំនួន ១១០នាក់រងរបួសនៅឯផ្សារដ៏ចង្អៀតមួយ នៅកណ្ដាលទីក្រុងបាកដាដកាលពីថ្ងៃព្រហស្បតិ៍។ វាគឺជាការវាយប្រហារដ៏សាហាវបំផុតលើទីក្រុងមួយនេះ ក្នុងរយៈពេល ៣ឆ្នាំនៅពេលដែលក្មាន់បំផ្ទុះគ្រាប់បែកអត្តឃាតម្នាក់ទៀត បានវាយប្រហារទៅលើតំបន់តែមួយ។
ក្រសួងមហាផ្ទៃបាននិយាយថា ក្មាន់វាយប្រហារដំបូង បានទាក់ទាញហ្វូងមនុស្សនៅឯផ្សារ ដែលមានសភាពអ៊ូអរនៅក្នុងទីលានចតុរ៉ង់តាយ៉ារ៉ាន (Tayaran Square) របស់រដ្ឋធានី ដោយអះអាងថា រូបគេមិនសូវស្រួលខ្លួន បន្ទាប់មកបានបំផ្ទុះគ្រឿងផ្ទុះ ដែលចងភ្ជាប់នឹងខ្សែក្រវ៉ាត់របស់គេ។ នៅពេលមានមនុស្សកាន់តែច្រើនឡើង ចូលទៅកន្លែងកើតហេតុដើម្បីជួយជនរងគ្រោះ ក្មាន់បំផ្ទុះគ្រាប់បែកអត្តឃាតទី២ បានបំផ្ទុះគ្រឿងផ្ទុះលើខ្លួនរបស់គេ។
ទីផ្សារកណ្ដាលវាល ជាទីដែលលក់សម្លៀកបំពាក់ជជុះ ត្រូវបានលក់នៅតាមតូបនានា បាននឹងកំពុងទាក់ទាញមនុស្សយ៉ាងច្រើនកុះករ បន្ទាប់ពីមានការដកវិធានការរឹតត្បិត រយៈពេលជិត ១ឆ្នាំដោយសារជំងឺ COVID-19 នៅទូទាំងប្រទេស។ មិនយូរប៉ុន្មានក្រោយការបំផ្ទុះគ្រាប់បែកសម្លាប់មនុស្ស ៣២នាក់រួចមក ក្រុមអ្នកកាន់មរណទុក្ខបាននាំគ្នាសែងមឈូសអ្នកដែលបានស្លាប់ ទៅកាន់តាមដងផ្លូវនានានៅក្នុងរដ្ឋធានីមួយនេះ៕
