42 បាល់ទាត់៖ ទីបំផុត Lionel Messi បានស្គាល់រសជាតិកាតក្រហមលើកដំបូងក្នុងអាជីពជាមួយ Barcelona ក្នុងការប្រកួតយប់មិញដែល Barcelona ចាញ់ Athletic Bilbao បាត់បង់ពាន Spanish Super Cup។
ការប្រកួតវគ្គផ្ដាច់ព្រ័ត្រនៅកីឡដ្ឋានរបស់ Sevilla, Barcelona រកបានគ្រាប់នាំមុខមុន ២លើកសុទ្ធតែសំរេចបានដោយខ្សែប្រយុទ្ធបារាំង Antoine Griezmann តែ Bilbao ក៏តាមស្មើពីរលើកដែរដោយ Oscar de Marcos និង Asier Villalibre។ ក្រុមទាំងពីរបញ្ចប់ ៩០នាទីដោយស្មើគ្នា ២–២ ហើយក៏ឈានដល់ម៉ោងបន្ថែមកាត់សេចក្តី ១៥នាទីពីរដង។ លេងបានតែ ៤នាទី Bilbao ក៏រកបានគ្រាប់នាំមុខលើកដំបូងដោយ Inaki Williams ខណៈ Barcelona មិនអាចតាមស្មើ Bilbao បានឡើយ មុនពេលដែល Lionel Messi ទទួលបានកាតក្រហមបណ្តេញចេញពីការប្រកួតនៅនាទីទី១២០ ក្រោយកំហុសលើ Asier Villalibre។
រំលឹកថា Lionel Messi មិនដែលទទួលបានកាតក្រហមនៅ Barcelona ឡើយ តែធ្លាប់បានកាតក្រហមលើកជាមួយក្រុមជំរើសជាតិអាហ្សង់ទីន ដែលរួមការបង្ហាញខ្លួនដំបូងនៅឆ្នាំ២០០៥ ទល់នឹងហុងគ្រី និងលើកទី២ នៅឆ្នាំ២០១៩ ប្រកួតដណ្តើមលេខ៣ ពាន Copa America ទល់នឹងស៊ីលី។ ដោយឡែកសំរាប់ Bilbao មុននឹងឡើងមកដល់វគ្គផ្តាច់ព្រ័ត្រនេះបានយកឈ្នះ Real Madrid នៅវគ្គពាក់កណ្តាលផ្តាច់ព្រ័ត្រ ដែលមានន័យថាជាលើកដំបូងរាប់ពីឆ្នាំ១៩៦០ ដែល Bilbao យកឈ្នះក្រុមយក្សទាំងពីរបន្តបន្ទាប់គ្នាបែបនេះ៕
