51 បាល់ទាត់៖ កីឡាករបាល់ទាត់អាជីពវ័យចំណាស់បំផុត Kazuyori Miura នៅមិនទាន់គិតគូរឿងចូលនិវត្តន៍ឡើយ បន្ទាប់ពីចុះកិច្ចសន្យាបន្ថែម ១ឆ្នាំទៀតជាមួយក្លិប Yokohama FC មានន័យថា Miura នឹងលេងបាល់ដល់វ័យ ៥៤ឆ្នាំ។
Kazuyori Miura នឹងឈានចូលវ័យ ៥៤ឆ្នាំនៅខែកុម្ភៈខាងមុខនេះ មុនពេលរដូវកាលថ្មីលីគកំពូលជប៉ុន J-League ចាប់ផ្តើម។ អតីតកីឡាករជំរើសជាតិជប៉ុនរូបនេះ បានប្រកបអាជីពជាមួយ Yokohama តាំងពីឆ្នាំ២០០៥ ខណៈឆ្នាំ២០២១ នេះនឹងជារដូវកាលទី១៧ របស់ Miura ជាមួយក្លិប។ រំលឹកថា Kazuyori Miura បានចាប់ផ្តើមអាជីពបាល់ទាត់ជាមួយក្លិបប្រេស៊ីល Santos នៅឆ្នាំ១៩៨៦ និងបានក្លាយជាកីឡាករវ័យចំណាស់បំផុត ស៊ុតបញ្ចូលទីក្នុងលីគអាជីពកាលពីឆ្នាំ២០១៧ ពេលស៊ុតចូលក្រុម Thespakusatsu Gunma ក្នុងវ័យ ៥០ឆ្នាំ ១៤ថ្ងៃ។ Miura រហ័សនាមថា King Kazu ធ្លាប់បង្ហាញខ្លួនអោយក្រុមជំរើសជាតិជប៉ុន ៨៩លើករកបាន ៥៥គ្រាប់ និងធ្លាប់ប្រកបអាជីពនៅអ៊ីតាលីជាមួយក្លិប Genoa មុនពេលបន្តអាជីពនៅទឹកដីក្រូអាស៊ី និងអូស្ត្រាលី៕
