71 (ភ្នំពេញ)៖ ខ្សែប្រយុទ្ធឆ្នើមវ័យក្មេង សៀង ចន្ធា បានបង្ហើបពីគោលដៅចង់ទៅលេងក្រៅស្រុកក្នុងរយៈពេល ១ឆ្នាំ ឬ ២ឆ្នាំខាងមុខ បន្ទាប់ពីរូបគេបានសម្រេចបំណងជួយក្លិបបឹងកេត គ្រងតំណែងជើងឯកលីគកំពូលកម្ពុជា ឆ្នាំ២០២០ ដែលជាជោគជ័យក្នុងឆ្នាំដំបូង ក្រោយរូបគេចាកចេញពីសាលាបាល់ទាត់ជាតិបាទី។
កីឡាករមានដើមកំណើតពីខេត្តកោះកុងរូបនេះបានបញ្ជាក់ថា «ខ្ញុំសប្បាយចិត្ត ដែលទទួលបានជ័យជម្នះជើងឯក ហើយវាគឺជាគោលដៅរបស់ខ្ញុំ។ ពេលខ្ញុំចាកចេញពីសាលាបាល់ទាត់ជាតិបាទី ខ្ញុំបានដាក់គោលដៅថា ខ្ញុំចង់ឈ្នះពាននៅក្លិបជាលើកដំបូង ហើយឥឡូវបានសម្រេចដូចបំណង គឺខ្ញុំសប្បាយចិត្ត»។
ចន្ធា បានបន្ដថា «ចំពោះគោលដៅខ្ញុំនៅរដូវកាលក្រោយ គឺខ្ញុំត្រូវបង្ហាញសមត្ថភាពឲ្យបានច្រើនជាងនេះទៀត ពិសេសក្នុងពានរង្វាន់ AFC Cup ដែលយើងមានអាទិភាពទៅប្រកួត ចឹងខ្ញុំដាក់គោលដៅ ខ្ញុំនឹងធ្វើឲ្យបានល្អនៅក្នុងការប្រកួតហ្នឹង។ ម្យ៉ាងវិញទៀត ខ្ញុំមានគោលដៅ អាចថា ១ឆ្នាំ ឬ ២ឆ្នាំទៀត ខ្ញុំចង់ទៅលេងនៅស្រុកក្រៅ»។
គួរដឹងថា ក្រោយចាកចេញពីបាទី និងបង្ហាញខ្លួនដំបូងជាមួយក្លិបបឹងកេតក្នុងរដូវកាលនេះ សៀង ចន្ធា បានបង្កព្យុះភ្លៀងលើទីលាន ហើយក្លាយជាចំណែកមួយដ៏សំខាន់ ជួយក្រុមនាគខៀវបឹងកេតសម្រេចបំណងលើកពានលីគជាលើកទី៤ ដោយ ចន្ធា រកបាន ៩គ្រាប់ ហើយក៏ជាដៃគូប្រយុទ្ធដ៏សំខាន់របស់ម្ចាស់ពានកីឡាករល្អជាងគេ កីឡាករ ម៉ាត់ នូរុណ ផងដែរ៕
