117 (វ៉ាស៊ីនតោន)៖ ភាពវឹកវរនៃការគ្រប់គ្រងមិនបានល្អ លើវិបត្តិ COVID-19 ដែលបានផ្ដាច់ជីវិតមនុស្សលើស ៦ម៉ឺននាក់ នៅក្នុងសហរដ្ឋអាមេរិក ត្រូវបានមជ្ឈដ្ឋានខ្លះ មើលឃើញថា អាចនឹងបំផ្លាញក្ដីសង្ឃឹមចង់ជាប់ឆ្នោតជាប្រធានាធិបតីអាមេរិកមួយអាណត្តិទៀតរបស់លោក ដូណាល់ ត្រាំ។ ប៉ុន្តែ អ្នកវិភាគលើការបោះឆ្នោតតាម ប្រព័ន្ធប្រតិភូ លោក Joshua Sandman យល់ថាលោក ត្រាំ នៅតែអាចទទួលបានជ័យជម្នះនៅក្នុងការបោះឆ្នោតប្រធានាធិបតីអាមេរិក នៅខែវិច្ឆិកា ឆ្នាំ២០២០ ខាងមុខនេះ សាជាថ្មីម្ដងទៀត។
មកទល់នឹងពេលនេះ បើទោះជាមិនទាន់មានការប្រកាសតែងតាំងជាផ្លូវការក៏ដោយ អតីតអនុប្រធានាធិបតីអាមេរិក លោក Joe Biden ត្រូវបានគេជឿជាក់នឹងក្លាយ ជាបេក្ខជនប្រធានាធិបតីអាមេរិកតំណាងឱ្យគណបក្សប្រជាធិបតេយ្យ ដែលនឹងត្រូវប្រជែងយកកៅអីប្រធានាធិបតីជាមួយលោក ដូណាល់ ត្រាំ។ បើតាម លោក Joshua Sandman ជាសាស្ត្រាចារ្យវិទ្យាសាស្ត្រនយោបាយនៃសាកលវិទ្យាល័យ University of New Haven នៅក្នុងការបោះឆ្នោតនៅខែវិច្ឆិកា ខាងមុខលោក ដូណាល់ ត្រាំ អាចនឹងទទួលបានសំឡេងប្រតិភូ ២៤៩ រីឯលោក Joe Biden ទទួលបាន២៤៨។ ប៉ុន្តែ លោកបន្ថែមថា លោក ត្រាំ អាចនឹងចាញ់សំឡេងបោះឆ្នោតសុទ្ធពីប្រជាជនអាមេរិក ឬ popular vote របស់លោក Biden។
លោក Joshua Sandman ធ្វើការព្យាករណ៍ខាងលើដោយផ្អែកលើកត្តាមួយចំនួនដូចជា៖
ទី១៖ នៅក្នុងការជជែកដេញ និងយុទ្ធនាការឃោសនាបោះឆ្នោតនាពេលកន្លងមក អតីតអនុប្រធានាធិបតីអាមេរិក លោក Joe Biden ចូលចិត្តលើកឡើងតែពីរឿង អតីតកាល ដែលមិនស្របទៅនឹងគំនិតរបស់យុវជនអាមេរិក នោះទេ។
ទី២៖ បើទោះជា បេក្ខជនប្រធានាធិបតី នៃគណបក្សប្រជាធិបតេយ្យមួយរូបទៀត លោក Bernie Sanders សម្រេចចិត្តគំាទ្រលោក Biden ក៏ដោយ ប៉ុន្តែអ្នកគាំទ្រ លោក Sanders មិនប្រាកដថានឹងបោះឆ្នោតឱ្យលោក Biden នោះដែរ ពីព្រោះអ្វីដែលអាចកែប្រែចិត្តពួកគេបាននោះគឺបញ្ហា និងមនោគមន៍វិជ្ជា មិនមែនភាព ស្មោះត្រង់លើលោក Sanders ទេ។ ពួកគេមើលឃើញថាលោក Biden គ្មានអី្វខុសគ្នាពីលោក ត្រាំ ឡើយ ហើយរឹតតែសំខាន់ជាងនេះទៅទៀត គឺការជំរុញរបស់ លោក Sanders ឱ្យលោក Biden ទទួលយកកម្មវិធីគោលនយោបាយអ្នកឆ្វេងនិយម និងសង្គមនិយមរបស់លោក បាន និងកំពុងធ្វើឱ្យអ្នកបោះឆ្នោតមាននិន្ននាការ កណ្ដាល បែរខ្នងដាក់លោក Biden ទៅវិញ។
ទី៣៖ សកម្មភាពរបស់កូនប្រុសលោក Biden ផ្ទាល់ គឺលោក Hunter Biden នឹងបន្តបំពុលយុទ្ធនាការឃោសនាបោះឆ្នោតនៃអតីតអនុប្រធានាធិបតីអាមេរិក រូបនេះ។ លោក Hunter Biden ត្រូវបានគេរាយការណ៍ថាបានទទួលយកតំណែង ក្នុងជួរក្រុមប្រឹក្សាភិបាល ប្រចាំក្រុមហ៊ុនមួយនៅក្នុងប្រទេស អ៊ុយក្រែន ដែលមានទំនាក់ទំនង រកស៊ីជាមួយចិន ខណៈឪពុករបស់លោកកំពុងកាន់តំណែងជាអនុប្រធានាធិបតីអាមេរិក នៅពេលនោះ។ នេះគឺជាទង្វើមិនត្រឹមត្រូវ និងខ្វះក្រមសីលធម៌ រីឯលោក ដូណាល់ ត្រាំ ផ្ទាល់ក៏ធ្លាប់បានយករឿងអាស្រូវនេះមកវាយប្រហារដើម្បីទម្លាក់ប្រជាប្រិយភាពរបស់លោក Biden ហើយលោកក៏ទំនងជានឹងបន្តយករឿងនេះរិះគន់ លោក Biden មុននឹងការបោះឆ្នោតមកដល់ក៏ថាបាន។
ទី៤៖ លោក ដូណាល់ ត្រាំ នៅតែអាចរក្សាបានការគាំទ្រជាមូលដ្ឋានពីប្រជាជនអាមេរិកស្បែកស ជាពិសេសគឺពីក្រុមអ្នកអភិរក្សនិយម។ ការគាំទ្ររបស់លោក នៅក្នុង ចំណោមប្រជាជនអាមេរិកស្បែកស មានភាពរឹងនៅសមរភូមប្រជែងប្រជាប្រិយភាព នៃតំបន់ភាគកណ្ដាលឈាងខាងលិច, ភាគនិរតី, ភាគខាងលិច និងភាគខាងត្បូង រួមទាំងរដ្ឋដែលមានការប្រកួតប្រជែងខ្លាំងដូចជា រដ្ឋ Florida, Iowa, Ohio, North Carolina, Nevada, Minnesota និងរដ្ឋ Michigan។
គួរជម្រាបថា ខណៈការដោះស្រាយ និងវិធានការគ្រប់គ្រងវិបត្តិ COVID-19 របស់លោក ដូណាល់ ត្រាំ កំពុងស្ថិតនៅក្រោមការស៊ើបអង្កេតមួយ ការស្ទង់មតិធ្វើឡើង ដោយ Reuters/Ipsos នៅក្នុងសប្ដាហ៍នេះ បានបង្ហាញថា ៤៤ភាគរយ នៃអ្នកចុះឈ្មោះបោះឆ្នោតនិយាយថាពួកគេ នឹងគាំទ្រលោក Biden នៅក្នុងការបោះឆ្នោត ជ្រើសរើសប្រធានាធិបតីអាមេរិក នៅថ្ងៃទី៣ ខែវិច្ឆិកា ខាងមុខនេះ ខណៈ៤០ភាគរយថានឹងបោះឆ្នោតគាំទ្រ លោក ដូណាល់ ត្រាំ៕
ប្រភព៖ The Hill (ថ្ងៃព្រហស្បតិ៍ ទី៣០ ខែមេសា ឆ្នាំ២០២០)
