75 (ភ្នំពេញ)៖ ឯកឧត្តម ខៀវ កាញារីទ្ធ បានថ្លែងបែបនេះ ក្នុងឱកាសអញ្ជើញជាអធិបតីក្នុងពិធីប្រគល់ពានរង្វាន់ ដល់អ្នកកាសែត ជ័យលាភី ក្នុងការ ប្រឡងសរសេរអត្ថបទសារព័ត៌មាន ក្នុងបរិបទកូវីដ-១៩ ដែលត្រូវបានរៀបចំឡើងដោយក្លិបអ្នកកាសែតកម្ពុជា នៅថ្ងៃទី០៧ ខែកញ្ញា ឆ្នាំ២០២០។
ឯកឧត្តម ខៀវ កាញារីទ្ធ បានថ្លែងយ៉ាងដូច្នេះថា៖ «បច្ចុប្បន្ននេះយើងដឹងហើយថា តម្លៃអ្នកសារព័ត៌មានយើងមួយចំនួនធ្លាក់ចុះ ដោយសារតែអ្នកព័ត៌មាន ឥតវិជ្ជាជីវៈ។ គាត់រញ៉ែរញ៉ៃច្រើន ធ្វើឲ្យយើងជាអ្នកមានវិជ្ជាជីវៈធ្លាក់ចុះ»។
ក្នុងន័យនេះ រដ្ឋមន្ត្រីក្រសួងព័ត៌មាន ស្នើដល់ក្លិបអ្នកកាសែតកម្ពុជាផ្សព្វផ្សាយឲ្យបានកាន់តែទូលំទូលាយ ពីវិជ្ជាជីវៈអ្នកសារព័ត៌មាន ដើម្បីឲ្យមានអ្នកព័ត៌មានវិជ្ជាជីវៈច្រើន ដែលបានគិតគូរពីសង្គម។ លោកក្រើនរំលឹកថា អ្នកសារព័ត៌មានវិជ្ជាជីវៈ មិនមែនជាអ្នកសារព័ត៌មានចាំតែចម្លងគេ និងចេះតែជេរគេនោះទេ។
ពាក់ព័ន្ធនឹងជំងឺកូវីដ១៩ ឯកឧត្តម បានទាញចំណាប់អារម្មណ៍ថា បរិបទនេះបង្ហាញឲ្យឃើញពីប្រទេសនានា លើពិភពលោកសុទ្ធតែអាត្មានិយម។ លោកថា ប្រទេសនានាបានក្លាយជាបុគ្គលនិយម មិនរួបរួមគ្នាក្នុងការរកវិធីសាស្ត្រ ដើម្បីប្រយុទ្ធប្រឆាំងនឹងកូវីដ១៩ឡើយ។
