9 ភ្នំពេញ៖ មកដល់ពេលនេះរាជធានីភ្នំពេញបានត្រៀមខ្លួនរួចរាល់ហើយ ក្នុងការរៀបចំកិច្ចប្រជុំអាស៊ាន និងកិច្ចប្រជុំពាក់ព័ន្ធនៅសប្តាហ៍ក្រោយនេះ ការរក្សាសន្តិសុខសណ្ដាប់ធ្នាប់ និងកែលម្អសោភ័ណភាពក៏បានធ្វើឡើងផងដែរ។
នៅសប្តាហ៍ក្រោយនេះរាជធានីភ្នំពេញនឹងមានការរៀបចំកិច្ចប្រជុំអាស៊ាន និងកិច្ចប្រជុំពាក់ព័ន្ធនានាជាច្រើន ដែលកម្ពុជាត្រូវធ្វើជាម្ចាស់ផ្ទះ នឹងមានថ្នាក់ដឹកនាំប្រទេសមហាអំណាចមួយចំនួនអញ្ជើញចូលរួមផងដែរ ជាកិច្ចការចំពោះមុខគណៈបញ្ជាការឯកភាពរាជធានីភ្នំពេញបានរៀបចំតម្រាយផ្លូវ សម្រាប់ប្រតិភូឆ្លងកាត់ មានការកែលម្អហេដ្ឋារចនាសម្ព័ន្ធ ការតុបតែងលម្អតាមសួនច្បារ តាមបងផ្លូវ និងតាមអាគារសំខាន់ៗមួយចំនួន ជាមួយគ្នានេះសណ្ឋាគារពាក់ព័ន្ធជាច្រើន ក៏ត្រូវបានគណៈបញ្ជាការឯកភាពរាជធានីភ្នំពេញប្រជុំពិភាក្សា និងរៀបចំតំបន់ទាំងអស់នោះផងដែរ។
តាមការបញ្ជាក់របស់លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានឱ្យដឹងថា ការរៀបចំតុបតែងលំអសោភ័ណភាពនៅរាជធានីភ្នំពេញ សម្រេចបានប្រមាណ ៩០ភាគរយហើយ ដើម្បីត្រៀមធ្វើជាម្ចាស់ផ្ទះកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលនឹងចាប់ផ្តើមនៅសប្តាហ៍ក្រោយ ហើយការរៀបចំសោភ័ណភាពនេះ នឹងត្រូវរួចរាល់មុនកិច្ចប្រជុំមកដល់។
ចំពោះកិច្ចការសន្តិសុខ និងសណ្ដាប់ធ្នាប់ គណៈបញ្ជាការឯកភាពរាជធានីភ្នំពេញក៏បានរៀបចំនូវតម្រាយផ្លូវសំខាន់ៗតែប្រតិភូត្រូវឆ្លងកាត់ផងដែរ។ ក្នុងកិច្ចប្រជុំកន្លងមករបស់សាលារាជធានីភ្នំពេញ គឺមានក្បួនជាង៣០ នឹងត្រូវធ្វើដំណើរឆ្លងកាត់រាជធានីភ្នំពេញ មានសណ្ឋាគារពាក់ព័ន្ធចំនួន៨ ដែលត្រូវបានយកចិត្តទុកដាក់ក្នុងការរៀបចំ និងរក្សាសន្តិសុខសណ្ដាប់ធ្នាប់នៅតំបន់ទាំងអស់នោះ។ កម្លាំងសន្តិសុខត្រូវបានរៀបចំឈរជើង និងល្បាតចាប់ពីពេលនេះទៅហើយ ព្រោះក្រុមការងារនៃកិច្ចប្រជុំអាស៊ាន កិច្ចប្រជុំពាក់ព័ន្ធមកពីបណ្ដាប្រទេសមួយចំនួនក៏បានមកដល់រាជធានីភ្នំពេញហើយដែរ។
រដ្ឋបាលរាជធានីភ្នំពេញក៏បានធ្វើការអំពាវនាវឲ្យប្រជាពលរដ្ឋដែលកំពុងរស់នៅរាជធានីភ្នំពេញ និងប្រកបរបរនានាមានការរៀបចំខ្លួន និងចូលរួមថែរក្សាសន្តិសុខសណ្ដាប់ធ្នាប់ បរិស្ថាន និងមានការយោគយល់នៅពេលដែលមានក្បួនប្រតិភូឆ្លងកាត់តំបន់រស់នៅ ឬការប្រកបរបរនានា ក៏ដូចជាផ្លូវដែលប្រជាពលរដ្ឋប្រើប្រាស់ផងដែរនោះ។
សូមបញ្ជាក់ថា នេះគឺជាលើកទីបីហើយដែលព្រះរាជាណាចក្រកម្ពុជាបានធ្វើជាម្ចាស់ផ្ទះនៃកិច្ចប្រជុំអាស៊ាន និងកិច្ចប្រជុំពាក់ព័ន្ធ។ លើកទីមួយដែលកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ានគឺនៅឆ្នាំ២០០២ លើកទី២ ឆ្នាំ២០១២ និងលើកទីបីនៅឆ្នាំ២០២២នេះ៕
