11 (ពោធិ៍សាត់)៖ ថ្លែងចេញពីខេត្តពោធិ៍សាត់ នៅព្រឹកថ្ងៃទី២៥ ខែតុលា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបន្ដថ្លែងអំណរគុណដល់សប្បុរសជននានាទាំងអស់ ដែលបានបន្ដឧបត្ថម្ភអង្ករ ឬថវិកាជូនដល់រាជរដ្ឋាភិបាលកម្ពុជា ដើម្បីរួមចំណែកដោះស្រាយបញ្ហាប្រឈមនានាជូនប្រជាពលរដ្ឋ ដែលរងនូវផលប៉ះពាល់ដោយគ្រោះទឹកជំនន់។
ក្នុងឱកាសអញ្ជើញប្រគល់ស្រូវពូជ ជូនកសិករជាង ៥ពាន់គ្រួសារនៅខេត្តពោធិ៍សាត់ សម្ដេចតេជោ ហ៊ុន សែន បានចាត់ទុកការចូលរួមចំណែកដោយស្ម័គ្រចិត្តនេះ គឺជាវប្បធម៌នៃការចែករំលែក សម្រាប់អ្នកដែលមានលទ្ធភាព តាមរយៈរាជរដ្ឋាភិបាល ជូនដល់អ្នកដែលមានជីវភាពខ្វះខាត និងទទួលរងនូវផលប៉ះពាល់។ សម្ដេចក៏បានច្រានចោលការចោទប្រកាន់របស់ក្រុមប្រឆាំងថា នេះជារបៀបដែលរាជរដ្ឋាភិបាល កៀរគររៃអង្គាសលុយពីអ្នកមាន។
សម្ដេចតេជោនាយករដ្ឋមន្ដ្រី បានមានប្រសាសន៍យ៉ាងដូច្នេះថា «ខ្ញុំសូមយកឱកាសនេះ អរគុណចំពោះសប្បុរសជននានាដែលបានផ្ដល់អង្ករ ឬថវិកា សម្រាប់ជួយរួមចំណែកជាមួយរាជរដ្ឋាភិបាល ដើម្បីដោះស្រាយបញ្ហារបស់ប្រជាជនរបស់យើង។ នេះហៅថា សិល្បៈ ឬវប្បធម៌នៃការចែករំលែក ដែលអ្នកមានលទ្ធភាពជួយទៅដល់អ្នកដែលខ្វះលទ្ធភាព នេះជាសណ្ដានចិត្តរបស់អ្នករកស៉ីមានបាន សម្រាប់ចែករំលែកទៅអ្នកក្រខ្សត់»។
ជាមួយគ្នានេះ សម្ដេចតេជោ ហ៊ុន សែន បានមើលឃើញថា ក្រៅពីឧបត្ថម្ភតាមរយៈរាជរដ្ឋាភិបាលហើយនោះ នៅតំបន់មួយចំនួនព្រះសង្ឃ និងអ្នកមានលទ្ធភាពមួយចំនួន បានផ្ដល់ផ្ទាល់ទៅកាន់ប្រជាពលរដ្ឋដែលរងគ្រោះ។ សម្ដេចក៏នៅតែបន្ដថ្លែងអំណរគុណដល់តេជគុណ ព្រះសង្ឃគ្រប់ព្រះអង្គ និងជនរួមជាតិ ដែលជួយដល់ប្រជាពលរដ្ឋក្នុងគ្រាលំបាក។
សម្ដេចតេជោ ហ៊ុន សែន អះអាងថា បើទោះបីឧបត្ថម្ភដល់ប្រជាពលរដ្ឋគ្រប់កាលៈទេសៈយ៉ាងនេះក្ដី ប៉ុន្ដែរាជរដ្ឋាភិបាលកម្ពុជា មិនទាន់ដល់ថ្នាក់ក្ស័យធន់នោះទេ ហើយការចូលរួមចំណែករបស់សប្បុរសជននេះ ក៏បង្កលក្ខណៈឲ្យរាជរដ្ឋាភិបាល មានឱកាសច្រើនដើម្បីចាត់ចែងសម្រាប់ប្រជាពលរដ្ឋ។
យ៉ាងណាមិញ សម្ដេចតេជោនាយករដ្ឋមន្ដ្រី ធ្លាប់បានបញ្ជាក់ថា រាជរដ្ឋាភិបាលស្វាគមន៍ជានិច្ចចំពោះការចូលរួមចំណែកពីព្រះសង្ឃ មន្ដ្រីរាជការ និងប្រជាពលរដ្ឋគ្រប់មជ្ឈដ្ឋានទាំងអស់ ខណៈរាជរដ្ឋាភិបាល ក៏បាននិងកំពុងគិតគូរប្រឹងប្រែងដោះស្រាយលើការងារនេះ។
សម្ដេចតេជោ ហ៊ុន សែន ក៏ធ្លាប់បានឲ្យដឹងថា ក្នុងចំណោមប្រជាពលរដ្ឋប្រមាណ១០ម៉ឺនគ្រួសារ មានអ្នកដែលទទួលផលប៉ះពាល់ពីគ្រោះទឹកជំនន់ ប្រមាណ១៨ភាគរយ ស្មើនឹង ប្រមាណជិត២ម៉ឺនគ្រួសារ ដែលនឹងត្រូវទទួលបានការអន្ដរាគមន៍។
សម្ដេចតេជោ ហ៊ុន សែន ក៏អំពាវនាវឲ្យបន្ដការយកចិត្ដទុកដាក់ តាមរយៈយុទ្ធការក្រុមការងាររបស់រាជរដ្ឋាភិបាល ចុះជួយមូលដ្ឋាន, ក្រុមការងារគណបក្សប្រជាជនកម្ពុជា ចុះជួយមូលដ្ឋាន, កាកបាទក្រហមកម្ពុជា និងសប្បុរសជន ជួយដល់បញ្ហាស្បៀង នៅទីកន្លែងដែលមានការខូចខាតធ្ងន់ និងអ្នកទីទ័លផងដែរ។ សម្តេចតេជោ ហ៊ុន សែន បានណែនាំឲ្យសិក្សាស្ថិតិប្រជាពលរដ្ឋរងគ្រោះដោយទឹកជំនន់ ហើយផ្តល់ការឧបត្ថម្ភរយៈពេល៣ខែ ដែលអាចចំណាយជាង២លានដុល្លារ៕
