11 ភ្នំពេញសាធារណរដ្ឋប៉ូឡូញ បានសម្រេចបើកស្ថានកុងស៊ុលកិត្តិយសរបស់ខ្លួន ប្រចាំនៅព្រះរាជាណាចក្រកម្ពុជា ដោយការបើកនេះគឺដើម្បីលើកកម្ពស់សេដ្ឋកិច្ច ពាណិជ្ជកម្ម និងវិនិយោគិនជាមួយកម្ពុជាឲ្យកាន់តែល្អប្រសើបន្ថែមទៀត ខណៈទំហំពាណិជ្ជកម្មទ្វេភាគីជាមួយកម្ពុជាកាលពីឆ្នាំ២០២១កន្លងទៅបានឡើងដល់៥៩០ដុល្លារអាមេរិកហើយនោះ។
ថ្លែងក្នុងឱកាសបើកសម្ពោធជាផ្លូវការនូវអគ្គកុងស៊ុលរបស់ខ្លួន នាថ្ងៃទី៥ ខែតុលា ឆ្នាំ២០២២នេះ នៅសណ្ឋាគាររ៉ូសវ៉ូត រាជធានីភ្នំពេញ លោក Waldemar Dubaniowski បានសម្តែងការស្វាគមន៍ ចំពោះការបើកស្ថានកុងស៊ុលកិត្តិយសប៉ូឡូញ ដែលនេះត្រូវបានចាត់ទុកថា ជាការបោះជំហានដ៏សំខាន់មួយ ក្នុងការអភិវឌ្ឍទំនាក់ទំនងរវាងប្រទេសទាំងពីរ (ប៉ូឡូញ-កម្ពុជា)។ លោកថាកុងស៊ុលកិត្តិយសនេះ ក៏មានតួនាទីសំខាន់ក្នុងការដើរតួនាទីជាស្ពាន ពិសេសរវាងរដ្ឋាភិបាល អ្នកជំនួញ ការសម្របសម្រួលវប្បធម៌ និងការផ្លាស់ប្តូរការសិក្សាផងដែរ។
លោកឯកអគ្គរដ្ឋទូតបានបន្តទៀតថា នៅក្នុងវិស័យសេដ្ឋកិច្ច ប៉ូឡូញបានក្លាយជាដៃគូដ៏សំខាន់មួយកម្ពុជា។ ទោះបីជាមានការរីករាលដាលនៃជំងឺកូវីដ១៩ក៏ដោយ ក៏ទំនាក់ទំនងពាណិជ្ជកម្មរវាងកម្ពុជា និងប៉ូឡូញ មានការកើនឡើងជាវិជ្ជមាន ដោយបានឈានដល់៥៩០លានដុល្លារ ក្នុងឆ្នាំ២០២១ ដែលតួលេខនេះកើនឡើងជាង៣០ភាគរយ បើធៀបនឹងរយៈពេលដូចគ្នាកាលពីឆ្នាំ២០២០។
ថ្លែងនៅក្នុងពិធីសម្ពោធនោះដែរ លោក ស សារិន ដែលត្រូវបានតែងតាំងជាកុងស៊ុលកិត្តិយស នៃសាធារណរដ្ឋប៉ូឡូញប្រចាំកម្ពុជា បានលើកឡើងថា ទំនាក់ទំនងកម្ពុជា-ប៉ូឡូញ គឺត្រូវបានដឹកនាំដោយកិច្ចសហប្រតិបត្តិការ ការយោគយល់ទៅវិញទៅមក និងចំណងមិត្តភាពដ៏យូរអង្វែង។ ប្រទេសទាំងពីរបានរក្សាទំនាក់ទំនងនិងកិច្ចសហប្រតិបត្តិការល្អ ក្នុងវិស័យការទូត វប្បធម៌ និងពាណិជ្ជកម្ម ចាប់តាំងតែពីការបង្កើតទំនាក់ទំនងការទូតកាលពីឆ្នាំ១៩៥៦មក។
ជាមួយគ្នានេះ លោក ស សារិន បានរំពឹងបន្ថែមថា ការបង្កើតស្ថានកុងស៊ុលកិត្តិយស នៃសាធារណរដ្ឋប៉ូឡូញនៅក្នុងប្រទេសកម្ពុជា នឹងជួយពង្រឹង និងធ្វើឲ្យស៉ីជម្រៅថែមទៀត នូវចំណងទាក់ទង ក៏ដូចជាកិច្ចសហប្រតិបត្តិការជាមិត្ត រវាងប្រទេសទាំងពីរ ក្នុងរយៈពេលជាច្រើនឆ្នាំតទៅមុខទៀត។ ក្នុងនាមជាកុលស៊ុលកិត្តិយស នៃសាធារណរដ្ឋប៉ូឡូញប្រចាំនៅកម្ពុជា លោកនឹងទទួលបន្ទុកនូវតួនាទីសំខាន់ៗ ដោយក្នុងនោះរួមមាន ទាំងតួនាទីជួយអភិវឌ្ឍន៍ និងពង្រឹងកិច្ចសហប្រតិបត្តិការផ្នែកសេដ្ឋកិច្ច ទេសចរណ៍ អប់រំ វិទ្យាសាស្រ្ត បច្ចេកទេស និងវប្បធម៌រវាងសាធារណរដ្ឋប៉ូឡូញ និងកម្ពុជា ព្រមទាំងជួយផ្សព្វផ្សាយលើកកម្ពស់សេដ្ឋកិច្ច វិទ្យាសាស្រ្ត វប្បធម៌ និងភាសារបស់ប៉ូឡូញ។ ការគាំទ្រជាមួយកិច្ចសហប្រតិបត្តិការជិតស្និទ្ធ ពីសំណាក់វិស័យរដ្ឋ និងឯកជន នឹងដើរតួនាទីជាកត្តាគន្លឹះមួយ ដើម្បីឆ្ពោះទៅរកភាពជោគជ័យ នៃការលើកស្ទួយចំណងទាក់ទងទ្វេភាគីរវាងកម្ពុជា និងប៉ូឡូញឲ្យដល់កម្រិតថ្មីមួយទៀត។
លោក ស សារិន បានអះអាងទៀតថា ការបង្កើតស្ថានកុលស៊ុលកិត្តិយសរបស់សាធាណរដ្ឋប៉ូឡូញនាពេលនេះ នឹងមិនត្រឹមជាការបើកទំព័រថ្មី នៃកិច្ចសហប្រតិបត្តិការកាន់តែជិតស្និទ្ធរវាងប្រទេសទាំងពីរប៉ុណ្ណោះទេ វាក៏នឹងជួយបំពេញបន្ថែមដល់កិច្ចប្រឹងប្រែង របស់ក្រសួងការបរទេស និងកិច្ចសហប្រតិបត្តិការអន្តរជាតិរបស់កម្ពុជា ក្នុងការអនុវត្តការទូតសេដ្ឋកិច្ចផងដែរ៕
