12 បាល់ទាត់៖ សហព័ន្ធកីឡាបាល់ទាត់កម្ពុជា(FFC) បានប្រកាសទទួលសំណើរបស់សហព័ន្ធកីឡាបាល់ទាត់បង់ក្លាដែស ដើម្បីរៀបចំការប្រកួតមិត្តភាពអន្ដរជាតិរវាងក្រុមជម្រើសជាតិទាំងពីរនាថ្ងៃទី២២ ខែកញ្ញាខាងមុខនៅពហុកីឡដ្ឋានជាតិមរតកតេជោ។
កន្លងមកធ្លាប់មានសេចក្ដីរាយការណ៍ថា សហព័ន្ធកីឡាបាល់ទាត់បង់ក្លាដែសក៏ធ្លាប់អញ្ជើញក្រុមជម្រើសជាតិកម្ពុជា ប្រកួតមិត្តភាពផងដែរកាលពីអំឡុងខែឧសភាកន្លងទៅ តែត្រូវបានកម្ពុជាបដិសេធ ព្រោះកម្ពុជាចង់ប្រកួតជាមួយប្រទេសជិតខាងជាង គ្រាដែលបង់ក្លាដែសចង់ប្រកួតជាមួយកម្ពុជាលើទឹកដីរបស់ខ្លួន។ ក្រុមទាំងពីរធ្លាប់ជួបគ្នានៅរាជធានីភ្នំពេញម្ដងរួចមកហើយ មុនផ្ទុះជំងឺរាតត្បាតជាសកលកូវីដ-១៩ កាលពីដើមឆ្នាំ២០១៩ ដោយកាលនោះកម្ពុជា បានចាញ់ក្រុមភ្ញៀវបង់ក្លាដែសដោយលទ្ធផល ១-០ នៅចុងម៉ោងនៅពហុកីឡដ្ឋានជាតិអូឡាំពិក។
សម្រាប់ជំនួបមិត្តភាពអន្ដរជាតិនាចុងខែកញ្ញាខាងមុខនេះដែរ ក៏ជាការត្រៀមរបស់ក្រុមគោព្រៃកម្ពុជាដើម្បីចូលរួមការប្រកួតពានរង្វាន់ជើងឯកអាស៊ីអាគ្នេយ៍ AFF Mitsubishi Electric Cup 2022 នាអំឡុងខែធ្នូ ឆ្នាំ២០២២ និងខែមករា ឆ្នាំ២០២៣ ខាងមុខផងដែរ៕
