19 ស្រីលង្កា៖ មេដឹកនាំបក្សប្រឆាំងរបស់ប្រទេសស្រីលង្កា ដែលកំពុងស្វែងរកតំណែងប្រធានាធិបតីនៅសប្តាហ៍ក្រោយ បានប្តេជ្ញាកាលពីថ្ងៃសុក្រថា នឹងស្តាប់ប្រជាជនដែលកំពុងតស៊ូឆ្លងកាត់វិបត្តិសេដ្ឋកិច្ចអាក្រក់បំផុត របស់ប្រទេសដីកោះមួយនេះ។
នៅក្នុងបទសម្ភាសន៍ជាមួយសារព័ត៌មាន The Associated Press ពីការិយាល័យរបស់លោក លោក Sajith Premadasa បាននិយាយថា ប្រសិនបើលោកទទួលជ័យជំនះក្នុងការបោះឆ្នោតនៅក្នុងសភា លោកនឹងធានាថា របបផ្តាច់ការនឹងមិនកើតឡើងទៀតនោះទេនៅក្នុងប្រទេសស្រីលង្កា។ លោក Premadasa និយាយថា គណបក្ស Samagi Jana Balawegaya របស់លោក និងសម្ព័ន្ធមិត្តបានគាំទ្រលោកជាបេក្ខជនប្រធានាធិបតី សម្រាប់ការបោះឆ្នោតនៅថ្ងៃទី 20 ខែកក្កដា ខណៈសមាជិកសភាទាំងអស់ 225រូបនឹងបោះឆ្នោតជ្រើសរើសប្រធានាធិបតីថ្មី។ ប៉ុន្តែលោកបានទទួលស្គាល់ថា លោកប្រឈមនឹងការងារលំបាកមួយចំនួនដើម្បីធានាបានការគាំទ្រ ដែលត្រូវការដើម្បីទទួលជោគជ័យចាប់តាំងពីសំឡេងភាគច្រើននៅក្នុងសភា នៅតែត្រូវបានគ្រប់គ្រងដោយគណបក្សរបស់លោក Rajapaksa។
អតីតប្រធានាធិបតីលោក Gotabaya Rajapaksa បានភៀសខ្លួនតាមយន្តហោះយោធាកាលពីថ្ងៃពុធទៅកាន់ប្រទេសម៉ាល់ឌីវ មុនពេលទៅកាន់ប្រទេសសិង្ហបុរី។ ការលាលែងរបស់លោកត្រូវបានប្រកាសជាផ្លូវការកាលពីថ្ងៃសុក្រ។ ក្រុមបាតុករបានចោទប្រកាន់លោក Rajapaksa និងគ្រួសារនយោបាយដ៏មានឥទ្ធិពលរបស់លោកថា បានលួចលុយពីស្ថាប័នរដ្ឋាភិបាល និងធ្វើឲ្យដួលរលំប្រទេសដោយការគ្រប់គ្រងសេដ្ឋកិច្ចមិនបានត្រឹមត្រូវ។ សម្រាប់ពេលនេះ តំណែងប្រធានាធិបតីត្រូវបានដាក់បំពេញដោយនាយករដ្ឋមន្ត្រីលោក Ranil Wickremesinghe ដែលបានស្បថចូលកាន់តំណែងជាមេដឹកនាំស្តីទី។ ក្រុមអ្នកតវ៉ាបានជំរុញឱ្យលោក Wickremesinghe លាលែងផងដែរ ហើយជំរុញឲ្យមានរដ្ឋាភិបាលរួបរួមមួយដើម្បីដោះស្រាយវិបត្តិសេដ្ឋកិច្ច ដែលបានបណ្ដាលឱ្យមានការខ្វះស្បៀងអាហារ ប្រេងឥន្ធនៈ និងតម្រូវការផ្សេងៗទៀត៕
