79 
ខេត្តព្រះសីហនុ ៖ មន្ត្រីអាជ្ញាសាលានៃសាលាដំបូងខេត្តព្រះសីហនុ សហការជាមួយរដ្ឋបាលខេត្ត បានចុះអនុវត្តដីការសម្រេចការពារលេខ.៦៥៧តរ/១៨ ចុះថ្ងៃទី១៨ ខែឧសភាឆ្នាំ២០១៨ របស់សាលាដំបូងខេត្តព្រះសីហនុ និងដីកាសម្រេចអនុវត្តជំនួសលេខ៧៧៦តរ/១៩ចុះថ្ងៃទី០៣ ខែកក្កដា ឆ្នាំ២០១៩ ដើម្បីសម្រេចចាត់ចែងឲ្យមានការរុះរើផ្ទះ របងបេតុងសំណង់រឹងមាំ និងតម្រូវឲ្យអ្នកចាំដីទាំងនោះចាកចេញពីដីម្ចាស់បំណុល ត្រូវប្រគល់ដីជូនម្ចាស់បំណុលវិញជាបណ្តោះអាសន្នរងចាំតុលាការសម្រេចក្តីស្ថាពរ ដែលស្ថិតនៅភូមិ១ សង្កាត់លេខ១ ខណ្ឌមិត្តភាព ខេត្តព្រះសីហនុ (បច្ចុប្បន្នប្តូរភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ)ថ្ងៃសុក្រ ១០កើត ខែកក្តិក ឆ្នាំកុរ ឯកស័ក ព.ស ២៥៦3 ត្រូវនឹងថ្ងៃទី០៦ ខែធ្នូ ឆ្នាំ២០១៩។
លោក ជា វិជ្ជៈ អភិបាលរងខេត្តព្រះសីហនុ បានដាក់កងកម្លាំងសមត្ថកិច្ចចម្រុះ ដើម្បីទប់ស្កាត់និងការពារសុវត្ថិភាពទីតាំងអនុវត្ដដីការរក្សាការពារ។ ការចុះអនុវត្តដីការសម្រេចការពារនេះ លោកបានណែនាំក្រុមពលរដ្ឋទាំង៣២គ្រួសាររួចហើយ ដីការក៏ត្រូវបានបិទដល់ផ្ទះរួចហើយដែរ ដើម្បីអោយពលរដ្ឋ ដែលរស់នៅលើដីមានទំនាស់ចំនួន១២ហិចតានៅទីនេះបានដឹង និងសហការ។ លោកក៏បានរំឭកដល់ក្រុមកំលាំងសម្រាប់រុះរើនេះ ត្រូវធ្វើយ៉ាងណាយកឥវ៉ានពួកគាត់ចេញ និងធ្វើឲ្យបានសមរម្យ។
ទាក់ទិននឹងករណីខាងលើនេះ លោកស្រី យូ ចិន្ថា តំណាងឲ្យប្រជាពលរដ្ឋចំនួន៣២គ្រួសារ បានសំណូមពរដល់អាជ្ញាសាលាត្រូវអនុវត្តយ៉ាងណាឲ្យបានត្រឹមត្រូវនិងកុំអោយមានភាពលំអៀងម្ខាងៗ។ ក្នុងការចុះអនុវត្ដការងារនេះ សាលាដំបូងខេត្ដព្រះសីហនុជាស្ថាប័នជំនាញអនុវត្ដច្បាប់ក្នុងរឿងក្ដីទាំងនេះ រីឯរដ្ឋបាលសាលាខេត្ដ និងកម្លាំងសមត្ថកិច្ចគ្រាន់តែជាស្ថាប័នដែលសហការ។
លោក អ៊ឹម សុភ័ក្រ្ត អាជ្ញាសាលានៃសាលាដំបូងខេត្តព្រះសីហនុ ប្រាប់ឲ្យដឹងថា ៖ ដីការរក្សាការពារនេះ ត្រូវតែអនុវត្ត ដោយតម្រូវឲ្យសហកូនបំណុលប្រគល់ការកាន់កាប់ដីរុះរើផ្ទះ សំណង់រឹងមាំ របងបេតុង និងចាកចេញពីលើដីកម្មសិទ្ធរបស់ម្ចាស់បំណុលមានទីតាំង នៅភូមិ១ សង្កាត់លេខ១ ខណ្ឌមិត្តភាព ខេត្តព្រះសីហនុ (បច្ចប្បន្នត្រូវបានប្តូរមកជាភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុវិញ) ដោយមានចំនួន៤បណ្ណ័ ជាបណ្តោះអាសន្នរងចាំតុលាការសម្រេចសំណុំរឿងអង្គសេចក្តីចប់ជាស្ថាពរ។ ដីការសម្រេចនេះ មានអានុភាពអនុវត្តភ្លាមទោះជាមានបណ្តឹងតវ៉ាក៏ដោយ។ ទីតាំងដីទំនាស់នេះ មានទំហំ១២ហិកតា ស្ថិតនៅភូមិ៣ សង្កាត់លេខ១ក្រុងព្រះសីហនុ ខេត្តព្រះសីហនុ។ មានម្ចាស់បំណុល ១.ឈ្មោះ បាញ់ សៀមអាន ភេទប្រុស អាយុ៦១ឆ្នាំ មានទីលំនៅស្ថិតនៅភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ និងមានកូនបំណុលឈ្មោះ ទក ផាត ឈ្មោះ ច្រឹក យឺន ឈ្មោះ សួន រ៉ាម៉ូ និងឈ្មោះ ផាត់ ភិរម្យ និង តតិយជនផ្សេងៗទៀត។
គួរបញ្ជាក់ថា ៖ ក្នុងការអនុវត្តដីការនេះ ត្រូវបានក្រុមប្រជាពលរដ្ឋធ្វើការតវ៉ាចំពោះការអនុវត្តដីការ តែដំណើរការនៅតែរលូនពុំមានការរារាំង ឬជំទាស់ណាមួយពីភាគីទំនាស់ ឬក្រុមប្រជាជន ដែលស្នាក់នៅលើទីតាំងដីទំនាស់នោះទេ។ ក្រុមពលរដ្ឋរស់នៅលើដីទំនាស់ យល់ព្រមរើឥវ៉ាន់ចេញដោយស្មគ្រ័ចិត្តរៀងៗខ្លួន។ យោងតាមការបញ្ជាក់ពីមន្រ្តីជំនាញ ប្រាប់ឲ្យដឹងដែរថា ខ្ទម ឬផ្ទះជាច្រើនខ្នង ត្រូវបានរុះរើចេញ៕
