13 ព្រៃវែង៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំទៅមន្ត្រីអាជ្ញាធរ ដែលជាកូតារបស់គណបក្សប្រជាជនកម្ពុជា (CPP) មិនត្រូវអួងអាងឌឺដង ដាក់ដង ដាក់ផ្លែ ទៅគណបក្សនយោបាយផ្សេងៗ ដែលចាញ់ឆ្នោតនោះទេ ព្រោះសុទ្ធសឹងតែជាខ្មែរដូចគ្នា។
នាឱកាសអញ្ជើញជាអធិបតីក្នុងពិធីបុណ្យបញ្ចុះខណ្ឌសីមាព្រះវិហារ វត្តពោធិរង្ស៊ី ហៅវត្តត្រពាំងទទឹម ស្ថិតក្នុងភូមិត្រពាំងទឹម ឃុំព្រាល ស្រុកកញ្ជ្រៀច ខេត្តព្រៃវែង នៅថ្ងៃទី១៩ ខែមិថុនា ឆ្នាំ២០២២ សម្ដេចក្រឡាហោម មានប្រសាសន៍ថា ដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ មានពលរដ្ឋចេញទៅបោះឆ្នោតច្រើនលើសលុប បង្ហាញអំពីការគាំទ្រដំំណើរការប្រជាធិបតេយ្យ និងការបន្តថែរក្សាសុខសន្តិភាព ដែលការបោះឆ្នោតនេះ បានប្រព្រឹត្តទៅដោយរលូន និងជោគជ័យ ក៏ជាការបង្ហាញកិត្តិយសជាតិលើឆាកអន្តរជាតិ និងពិតជាមានមោទកភាព ចំពោះការចូលរួមគោរពច្បាប់ បទបញ្ជា និងនីតិវិធីនៃការបោះឆ្នោតពីគ្រប់ភាគី។
សម្ដេចបន្តថា ក្រុមប្រឹក្សាឃុំសង្កាត់ ដែលឈ្នះការបោះឆ្នោតត្រូវសងគុណពលរដ្ឋ គិតឱ្យជ្រៅជ្រះ កុំថាខ្លួនឯងខ្លាំងទើបឈ្នះឆ្នោត ព្រោះខ្លាំងបាន ដោយសារពួកគាត់បោះឆ្នោត ដែលពលរដ្ឋគឺជាម្ចាស់សិទ្ធិ ម្ចាស់អំណាច ហើយបានធ្វើមេឃុំនេះ គឺពលរដ្ឋជាអ្នកផ្ដល់ឲ្យ ដូច្នេះត្រូវបំរើពួកគាត់ឱ្យអស់ពីលទ្ធភាព ត្រូវធ្វើឱ្យមានទំនុកចិត្ត ដ្បិតមិនមែនគ្រាន់តែបោះឆ្នោតឱ្យនោះទេ ថែមទាំងផ្ដល់ប្រាក់ខែជូនទៀត តាមរយៈប្រាក់ខែរដ្ឋ ដែលក៏ជាប្រាក់របស់ពលរដ្ឋ។
សម្ដេចក្រឡាហោម បានបន្ថែមថា សម្រាប់ក្រុមប្រឹក្សាឃុំសង្កាត់ឈ្នះឆ្នោត កុំអួតកុំអាង កុំឆ្មើងកុំឆ្មៃ ហើយកុំដាក់ដងដាក់ផ្លែផ្កាជាមួយអ្នកមិនជោគជ័យ ឬអ្នកដែលចាញ់ គឺកុំនិយាយឱ្យសោះ អត់មានប្រយោជន៍អ្វីនោះទេ គ្រាន់តែបំរើមហិច្ចតាខ្លួនឯង គំនិតខ្លួនឯងប៉ុណ្ណឹង ប៉ុន្តែឱ្យសម្រាប់សង្គមជាតិអត់មានទេ ដោយអ្នកទាំងអស់នេះត្រូវរឹតតែធ្វើល្អដាក់ ដើម្បីឱ្យពួកគេឃើញថានយោបាយគណបក្សប្រជាជនកម្ពុជា មិនមានការរើសអើងបក្សភ្លើងទៀនក៏ដោយ ភ្លើងធូបក៏ដោយ បោះឆ្នោតហើយធ្វើការជាមួយគ្នាទៅ ព្រោះសុទ្ធតែខ្មែរដូចគ្នាទេ ។
ជាមួយនេះ រដ្ឋមន្ត្រីក្រសួងមហាផ្ទៃ បានអំពាវនាវពលរដ្ឋចូលរួមបង្កើនការអប់រំកូនចៅចៀសឱ្យផុតពីអំពើអបាយមុខ ពិសេសចៀសឱ្យឆ្ងាយពីគ្រឿងញៀន និងពលរដ្ឋទាំងអស់ចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន នៅរៀងរាល់ពេលធ្វើដំណើរតាមដងផ្លូវ ត្រូវពាក់មួកសុវត្ថិភាព ហើយអាណាព្យាបាល ឪពុកម្ដាយ ជីដូនជីតា បង្កើនការប្រុងប្រយត្នចំពោះកុមារតូច ដែលអាចជួបគ្រោះថ្នាក់លង់ទឹកនារដូវវស្សានេះ ៕
