12 
បាល់ទាត់៖ ក្រុមបាល់ទាត់សាមូរ៉ៃជប៉ុនបានកក់កៅអីព្រឹត្តិការណ៍បាល់ទាត់ពិភពលោក World Cup 2022 ប្រទេសកាតាហើយក្រោយយកឈ្នះនៅទឹកដីអូស្ត្រាលី ២-០ ម្សិលមិញនៅទីក្រុងស៊ីដនីប្រទេសអូស្ត្រាលី។ ជប៉ុនជាក្រុមមានប្រៀបលើម្ចាស់ផ្ទះ និងមានឱកាសច្រើនលើកតែត្រូវរារាំងដោយរបាទី ដូចជាការតែតរបស់ខ្សែប្រយុទ្ធ Liverpool, Takumi Minamino ជាដើម។
យ៉ាងណាក្តីគ្រាប់បាល់របស់ជប៉ុនត្រូវរង់ចាំស្ទើចប់ការប្រកួតទៅហើយ ពោលគឺកីឡាករខ្សែប្រយុទ្ធរបស់ក្លិប Brighton, Kaoru Mitoma គឺជាអ្នកសំរេចជោគវាសនាជប៉ុននៅនាទីទី៨៩ មួយគ្រាប់ និងនាទីទី៩០+៤ មួយគ្រាប់។ ជ័យជំនះនេះធ្វើឱ្យជប៉ុនធានាបានកៅអី World Cup ស្វ័យប្រវត្តិដោយដាច់ក្រុមលេខ៣ ដែលជាកៅអី Play-Off ៦ពិន្ទុខណៈនៅសល់តែ ១ប្រកួតទៀតចប់។ World Cup នៅកាតានឹងជាព្រឹត្តិការណ៍បាល់ទាត់ពិភពលោកលើកទី៧ ដែលជប៉ុនបង្ហាញខ្លួន និងតែងតែមានមុខជានិច្ចតាំងពី World Cup 1998 នៅប្រទេសបារាំង។ ចំណែកអូស្ត្រាលីក៏មិនទាន់អស់ឱកាសដែរ ដោយនៅសល់ឱកាសប្រកួតវគ្គ Play-Off ដើម្បីក្តីសង្ឃឹមបង្ហាញខ្លួននៅ World Cup ជាលើកទី៥។
ដោយឡែកសំរាប់អារ៉ាប៊ីសាអ៊ូឌីតយប់មិញ ធ្វើអ្វីក្រុមម្ចាស់ផ្ទះចិនមិនបានឡើយបានត្រឹមស្មើគ្នា ១-១ តែអារ៉ាប៊ីសាអ៊ូឌីតមានកៅអី World Cup ដោយស្វ័យប្រវត្តិទៅហើយដោយនាំមុខដាច់ក្រុមលេខ៣ អូស្ត្រាលី ៥ពិន្ទុ។ ងាកមកក្រុមវៀតណាមបានបិទបញ្ចប់ការប្រកួតនៅក្នុងទឹកដី នៃវគ្គជំរុះរបស់ខ្លួនដោយបរាជ័យក្រោមស្នាដៃក្រុមភ្ញៀវអូម៉ង់ ១-០ បន្តឈរក្រោមគេក្នុងពូល។ នៅសល់មួយប្រកួតចុងក្រោយក្នុងពូល B នេះវៀតណាមត្រូវទៅទឹកដីជប៉ុន អូម៉ង់ទទួលចិន និងអារ៉ាប៊ីសាអ៊ូឌីតទទួលអូស្ត្រាលី តែការប្រកួតចុងក្រោយនេះត្រឹមបង្គ្រប់កិច្ចប៉ុណ្ណោះ ពោលគឺកៅអីស្វ័យប្រវត្តិធានាបានរួចរាល់គឺជប៉ុន និងអារ៉ាប៊ីសាអ៊ូឌីត និងអូស្ត្រាលីឈានទៅវគ្គ Play-Off៕
