8 
ការ៉ាតេ៖ ការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍លើកទី៩ ឆ្នាំ២០២២ ដែលកម្ពុជាធ្វើជាម្ចាស់ផ្ទះនឹងចាប់ផ្ដើមពីថ្ងៃទី២១ ដល់ថ្ងៃទី២៧ ខែមីនាសប្ដាហ៍ក្រោយនេះហើយដោយនឹងមានប្រតិភូ និងអត្តពលិក ៩ប្រទេសចូលរួមរួមមានម្ចាស់ផ្ទះកម្ពុជា ប្រ៊ុយណេ ឥណ្ឌូនេស៊ី ឡាវ ម៉ាឡេស៊ី ហ្វីលីពីន សិង្ហបុរី ថៃ និងវៀតណាម។
យោងតាមមន្ដ្រីជាន់ខ្ពស់សហព័ន្ធកីឡាការ៉ាតេកម្ពុជា ក្នុងចំណោម ៩ប្រទេសដែលចូលរួមព្រឹត្តិការណ៍ថ្នាក់តំបន់នៅកម្ពុជានេះគឺមានមន្ដ្រីដឹកនាំសរុប ១០៤នាក់ និងកីឡាករ-កីឡាការិនី ១២១នាក់។ នេះគឺជាការលើកទឹកចិត្តម្ចាស់ផ្ទះក្នុងចំណោម ១១ប្រទេសគឺអវត្តមានតែមីយ៉ាន់ម៉ា និងប្រទេសទីម័រខាងកើតតែប៉ុណ្ណោះ។ រីឯទីលានប្រកួតនឹងធ្វើឡើងនៅមជ្ឈមណ្ឌលកីឡាការ៉ាតេនៃសាកលវិទ្យាល័យភូមិន្ទភ្នំពេញ។ ឯកឧត្តម វ៉ាត់ ចំរើន អគ្គលេខាធិការសហព័ន្ធកីឡាការ៉ាតេកម្ពុជាបានថ្លែងក្នុងកិច្ចប្រជុំកាលពីថ្មីៗថា ការប្រកួតកីឡាការ៉ាតេជើងឯកអាស៊ីអាគ្នេយ៍នេះ គឺជាយុទ្ធសាស្ដ្រពិសេសរបស់សហព័ន្ធ ដើម្បីវិនិច្ឆ័យអំពីកម្រិតបច្ចេកទេសនៃការរៀបចំផង និងសមត្ថភាព ក៏ដូចជាគុណផលរបស់កីឡាករ-កីឡាការិនីជម្រើសជាតិផង បន្ទាប់ពីឆ្លងកាត់ការប្រមូលផ្ដុំហ្វឹកហាត់ជាមួយគ្រូបង្វឹកបរទេស ដើម្បីត្រៀមការប្រកួតកីឡាស៊ីហ្គេម ២លើកចំពោះមុខគឺស៊ីហ្គេមលើកទី៣១ នៅវៀតណាម និងស៊ីហ្គេមលើកទី៣២ ឆ្នាំ២០២៣ នៅកម្ពុជា។
អគ្គលេខាធិការគណៈកម្មាធិការជាតិ CAMSOC ដដែលបន្ដថា នេះជាលើកទី១ ហើយដែលកីឡារ៉ាតេទទួលបានសិទ្ធធ្វើម្ចាស់ផ្ទះការប្រកួតជើងឯកអាស៊ីអាគ្នេយ៍ ហើយក្នុងនាមម្ចាស់ផ្ទះព្រឹត្តិការណ៍ថ្នាក់តំបន់នេះ សហព័ន្ធប្ដេជ្ញានឹងរៀបចំធ្វើឲ្យបានល្អប្រសើរបំផុតតាមគន្លងថ្មីក្នុងបរិបទកូវីដ-១៩ ជាមួយការអនុវត្តវិធានការសុខាភិបាលដ៏តឹងរឹង ដើម្បីធានានូវសុខសុវត្ថិភាពជូនប្រតិភូ និងអត្តពលិកចូលរួម ពិសេសគឺដើម្បីមុខមាត់ និងកិត្តិយសជាតិតែម្ដង៕
