11 
បាល់ទាត់៖ អនាគតរបស់មហាសេដ្ឋីរុស្ស៊ីលោក Roman Abramovich ក្នុងការកាន់កាប់ក្លិប Chelsea កំពុងស្ថិតក្នុងមន្ទិលដោយបានប្រកាសលក់ក្លិបក្នុងតម្លៃប្រហែល ៣ពាន់លានផោន។ មហាសេដ្ឋីស្វ៊ីសលោក Hansjorg Wyss បានប្រាប់សារព័ត៌មានស្វ៊ីសមួយថា Abramovich កំពុងត្រូវការលក់ក្លិប Chelsea ឱ្យបានកាន់តែឆាប់កាន់តែល្អ បន្ទាប់ពីសភាអង់គ្លេសបានចោទប្រកាន់ពីអំពើពុករលួយរបស់មហាសេដ្ឋីរុស្ស៊ីរូបនេះ នឹងឈានដល់ការដាក់ទណ្ឌកម្មផងដែរ។
ការចោទប្រកាន់ទាំងឡាយ ការចាប់ផ្តើមស៊ើបអង្កេតពីបញ្ហាពុករលួយរបស់លោក Roman Abramovich ធ្វើឡើងស្របពេលដែលរុស្ស៊ីបានចាប់ផ្តើមវាយលុកឈ្លានពាន ចូលទឹកដីអ៊ុយក្រែនផងដែរ។ យ៉ាងណាក្តីក្លិបបាល់ទាត់ដែលមានមូលដ្ឋាននៅទីក្រុងឡុងដ៍មួយនេះ បានធ្វើការច្រានចោលភ្លាមៗផងដែរពីការលើកឡើង របស់មហាសេដ្ឋីស្វ៊ីសលោក Hansjorg Wyss។ សូមបញ្ជាក់ថា មហាសេដ្ឋីរុស្ស៊ីវ័យ ៥៥ឆ្នាំ Roman Abramovich ត្រូវបានគេចោទប្រកាន់ថា មានទំនាក់ទំនងជិតស្និតជាមួយប្រធានាធិបតីរុស្ស៊ីលោក Vladimir Putin។ មិនត្រឹមតែលោក Abramovich ទេ សេដ្ឋីមានលុយរាប់ពាន់លានរបស់រុស្ស៊ីផ្សេងទៀត ក៏ស្ថិតក្រោមការគំរាមកំហែងពីការដាក់ទណ្ឌកម្មរបស់អឺរ៉ុបផងដែរ៕
