12 
ភ្នំពេញ៖ ក្រសួងសុខាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍ទាំងអស់ នាព្រឹកថ្ងៃទី២១ ខែកុម្ភះ ឆ្នាំ២០២២នេះ បានប្រារព្ធទិវាជាតិសុខភាពមាតា ទារក និងកុមារ ក្រោមប្រធានបទ«ពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ និងផ្តល់វ៉ាក់សាំងកូវីដ-១៩ ជូនស្រី្តមានផ្ទៃពោះ និងមាតាកំពុងបំបៅកូន»។
ទិវាជាតិនេះ មានគោលបំណងលើកកម្ពស់ផ្តល់ចំណេះដឹងពីសារៈសំខាន់នៃការផ្តល់វ៉ាក់សាំងកូវីដ-១៩ ដល់ស្រី្តមានផ្ទៃពោះមុនសម្រាល និងក្រោយសម្រាលក្នុងអំឡុងពេលការរាតត្បាតជាសកល នៃជំងឺកូវីដ១៩ និងលើកកម្ពស់ការបំបៅកូនដោយទឹកដោះម្តាយទោះបីម្តាយមានឆ្លងកូវីដ-១៩។ ជាមួយគ្នានោះលោកជំទាវវេជ្ជបណ្ឌិត លី អាយឡែន តំណាងអង្គការសុខភាពពិភពលោកប្រចាំព្រះរាជាណាចក្រកម្ពុជា បានលើកឡើងថា មេរោគកូវីដ១៩ ប្រភេទអូមីក្រុង បច្ចុប្បន្នកំពុងចរាចរយ៉ាងទូលំទូលាយនៅក្នុងសហគមន៍ ហើយកម្ពុជាកំពុងប្រឈមមុខនឹងការកើនឡើងនៃករណីឆ្លង។ ប្រព័ន្ធសុខាភិបាលត្រូវបានការពារ រៀបចំនិងត្រៀមខ្លួនជាស្រេច ដើម្បីបែងចែកករណីមួយចំនួនធំសម្រាប់ការថែទាំព្យាបាលនៅផ្ទះ និងត្រៀមបម្រុងមនី្ទរពេទ្យ និងគ្រែសម្រាប់ជួយសង្គ្រោះបន្ទាន់ សម្រាប់អ្នកជំងឺដែលត្រូវការចាំបាច់នូវការជួយសង្រ្គោះ។ យើងរំពឹងថានឹងមានការកើនឡើង នៃករណីឆ្លងអូមីក្រុង ក្នុងប៉ុន្មានសប្តាហ៍ និងខែខាងមុខនេះ។
លោកជំទាវវេជ្ជបណ្ឌិត សូមឆ្លៀតឱកាសនេះ ដើម្បីអំពាវនាវសូមឲ្យមានសេវាសារវ័ន្តសុខាភិបាលទាំងអស់ ត្រៀមជាស្រេចរួមទាំងសេវាសុខភាពមាតា ទារក និងកុមារផងដែរ។
នាឱកាសដ៏មហោឡារិកនេះ លោកជំទាវ វេជ្ជបណ្ឌិត ប្រាក់ សោភ័ណនាទី រដ្ឋលេខាធិការ និងជាតំណាងឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានថ្លែងសារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្រី្ត និងកុមារ ក្នុងឱកាសទិវាជាតិសុខភាពមាតា ទារក និងកុមារ ២១ កុម្ភៈ ២០២២នេះថា ក្នុងបរិបទនៃជំងឺកូវីដ-១៩ បច្ចុប្បន្នដែលតម្រូវឲ្យប្រជាពលរដ្ឋគ្រប់រូប ត្រូវរស់នៅតាមគន្លងប្រក្រតីភាពថ្មី ក្នុងបរិបទ នៃជំងឺកូវីដ-១៩ សម្តេចកិតិ្តព្រឹទ្ធបណ្ឌិត សូមអំពាវនាវដូចតទៅ៖ សូមស្រី្តមានផ្ទៃពោះទាំងអស់ ទៅពិនិត្យសុខភាព ពិគ្រោះយោបល់ជាមួយគ្រូពេទ្យ ឆ្មបជំនាញ នៅមណ្ឌលសុខភាព ឬមនី្ទរពេទ្យដែលនៅជិតផ្ទះ ឲ្យបានទៀងទាត់ចំនួន៤ដង តាមពេលវេលា និងការណែនាំរបស់គ្រូពេទ្យ ទទួលថ្នាំបង្ការជំងឺតេតាណូស និងថ្នាំបង្ការជំងឺកូវីដ១៩ ទទួលយកសេវាបង្ការព្យាបាលទាំងអស់ ពិសេសការស្ម័គ្រចិត្តធ្វើតេស្តឈាមរកមេរោគអេដស៍ ស្វាយ រលាកថ្លើម ប្រភេទបេ ដើម្បីរួមគ្នាលុបបំបាត់ការចម្លងមេរោគពីម្តាយទៅកូន។ សូមទៅសម្រាលកូននៅមណ្ឌលសុខភាព ឬមនី្ទរពេទ្យដែលមានគ្រូពេទ្យ ឬឆ្មបជំនាញ ដែលទទួលបានការបណ្តុះបណ្តាលត្រឹមត្រូវ និងទៅពិនិត្យសុខភាពក្រោយពេលសម្រាលទាំងមាតា ទាំងទារក យកកូនទៅទទួលវ៉ាក់សាំងបង្ការជំងឺទាំង១១មុខ តាមពេលវេលាកំណត់ ពិនិត្យតាមដានសុខភាព និងការលូតលាស់របស់កូន រហូតដល់កូនមានអាយុពីរឆ្នាំ។ សូមបំបៅកូនដោយទឹកដោះម្តាយតែមួយមុខគត់ ចាប់ពីពេលទារកកើតភ្លាមរហូតដល់ទារកមានអាយុ៦ខែ និងផ្តល់អាហារបន្ថែមគ្រប់មុខ គ្រប់ជីវជាតិ រួមជាមួយការបន្តបំបៅទឹកដោះម្តាយរហូតដល់កុមារមានអាយុយ៉ាងតិច២ឆ្នាំ។
ប្រញាប់យកទារកទៅមនី្ទរពេទ្យភ្លាម នៅពេលឃើញសញ្ញាគ្រោះថ្នាក់ណាមួយ នៃជំងឺរលាកផ្លូវដង្ហើម ជំងឺរាគ ឬជំងឺផ្សេងទៀត និងយកទារក ឬកុមារតូច ដែលមានរាងកាយស្គម ឬមិនឡើងទម្ងន់សោះទៅពិគ្រោះយោបល់ និងទទួលការព្យាបាលនៅមនី្ទរពេទ្យ។ សូមជ្រើសរើសការពន្យាកំណើត ដើម្បីសុខភាពរបស់ម្តាយ និងទារក និងសូមឲ្យស្រី្តមានផ្ទៃពោះ ស្រី្តជាមាតា កំពុងបំបៅកូនដោយទឹកដោះម្តាយទាំងអស់ អនុវត្តឲ្យបានខ្ជាប់ខ្ជួននូវវិធានការការពារ ៣ការពារ ៣កុំ និងការណែនាំនានារបស់ក្រសួងសុខាភិបាល និងសូមទៅទទួលវ៉ាក់សាំងបង្ការជំងឺកូវីដ-១៩ តាមវេន និងកាលកំណត់ឲ្យបានគ្រប់ៗគ្នា៕
