លោក Duterte ព្រមានចាប់ខ្លួន អ្នកដែលមិនទាន់ចាក់វ៉ាក់សាំង ហើយល្មើសបទបញ្ជាទប់ស្កាត់កូវីដ-១៩

(ម៉ានីល)៖ ប្រធានាធិបតីហ្វីលីពីនលោក រ៉ូឌ្រីហ្គោ ឌូតឺតេ (Rodrigo Duterte) បានព្រមាននៅព្រហស្បតិ៍សប្តាហ៍នេះថា អ្នកដែលមិនទាន់បានទទួលការចាក់ វ៉ាក់សាំងបង្ការជំងឺ COVID-19 នឹងត្រូវចាប់់ខ្លួនប្រសិនបើពួកគេ មិនគោរពបទបញ្ជាឲ្យស្នាក់នៅក្នុងផ្ទះ ខណៈការឆ្លងរាតត្បាតវីរុសនេះ បានកើនឡើងដល់កម្រិតខ្ពស់វិញ នៅក្នុងប្រទេសដីកោះនេះ ដែលមិនធ្លាប់មាន ៣ខែមកហើយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នាព្រឹកថ្ងៃសុក្រ ទី៧ ខែមករា ឆ្នាំ២០២២។

នៅក្នុងការថ្លែងសារទៅកាន់ប្រជាជាតិ កាលពីថ្ងៃព្រហស្បតិ៍សប្តាហ៍នេះ លោក Duterte បានជំរុញឲ្យមេដឹកនាំសហគមន៍ទាំងអស់ នៃប្រទេសហ្វីលីពីន សម្លឹងមើលអ្នកដែលមិនទាន់ទទួលបាន ការចាក់វ៉ាក់សាំងបង្ការ COVID-19 ឲ្យបានដិតដល់បំផុត ហើយត្រូវប្រាកដថា ពួកគេទាំងនោះស្នាក់នៅក្នុងផ្ទះ មិនចេញទៅក្រៅ។ បុរសខ្លាំងហ្វីលីពីនរូបនេះ បានសង្កត់ធ្ងន់ថា ប្រសិនបើនរណាម្នាក់ប្រឆាំងបទបញ្ជា ហើយនៅតែជម្នះចេញទៅក្រៅផ្ទះ ទាំងដែលខ្លួនមិនទាន់បានទទួលការចាក់វ៉ាក់សាំងនោះ អាជ្ញាធរមានសមត្ថកិច្ច អាចចាប់ខ្លួនបុគ្គលនោះបាន។

គួរបញ្ជាក់ថា ចំណាត់ការក្តៅពីសំណាក់ប្រធានាធិបតីហ្វីលីពីនខាងលើនេះ បានកើតមានឡើងបន្ទាប់ពីករណីឆ្លង COVID-19 ត្រូវបានគេមើលឃើញថា កំពុងកើនឡើងវិញយ៉ាងគំហុក នៅលើប្រទេសដីកោះនេះ។ កាលពីថ្ងៃព្រហស្បតិ៍ ទី៦ ខែមករា ឆ្នាំ២០២២ ប្រទេសហ្វីលីពីនបានប្រកាសរកឃើញករណីឆ្លងរហូតដល់ ១៧,២២០ករណី ដែលជាតួលេខខ្ពស់បំផុតមិនធ្លាប់មាននោះឡើយ គិតចាប់តាំងពីថ្ងៃទី២៦ ខែកញ្ញា ឆ្នាំ២០២១។

គិតត្រឹមពេលនេះ ហ្វីលីពីនមានករណីឆ្លង COVID-19 សរុប ២.៨៨លានករណី ក្នុងនោះស្លាប់ជាង ៥១,៧០០នាក់ និងជាសះស្បើយវិញ ២.៧៨លាននាក់។ ដោយឡែកសម្រាប់ការចាក់វ៉ាក់សាំងបង្ការ COVID-19 វិញនោះ ហ្វីលីពីនសម្រេចបាន ១១១លានដូសហើយ ដោយក្នុងនោះប្រជាជន ៥១.១លាននាក់ (៤៦.៦% នៃចំនួនប្រជាជានសរុប) បានទទួលការចាក់គ្រប់ដូស៕