14 
បាល់ទាត់៖ ខ្សែប្រយុទ្ធក្លិបបឹងកេត ចាន់ វឌ្ឍនាកា បានតាមស្មើកំណត់ត្រារបស់អតីតខ្សែប្រយុទ្ធកម្ពុជាលោក ហុក សុចិត្រា ហើយក្នុងនាមជាកីឡាករដែលស៊ុតបញ្ចូលទីច្រើនជាងគេ នៅព្រឹត្តិការណ៍បាល់ទាត់ជើងឯកអាស៊ាន AFF Championship។ ក្រុមគោព្រៃកម្ពុជាបានយកឈ្នះក្រុមឡាវ ៣-០ ក្នុងជំនួបទី៣ ក្នុងពូល B ដោយគ្រាប់បាល់របស់ ចាន់ វឌ្ឍនាកា ពីរគ្រាប់ម្នាក់ឯងក្នុងវគ្គទី១ នៅនាទីទី៣១ និងមួយគ្រាប់ទៀតតែតបញ្ចូលទីនៅនាទីទី៤១។
មួយគ្រាប់ទៀតរបស់កម្ពុជាធ្វើបានដោយខ្សែប្រយុទ្ធបឹកកេតមួយរូបទៀតគឺ សៀង ចន្ធា នៅនាទីទី៧៤ និងឱកាសជាច្រើនទៀតរបស់កម្ពុជាតែគ្មានសំណាង។ ពីរគ្រាប់របស់ ចាន់ វឌ្ឍនាកា យប់មិញធ្វើគេមានគ្រាប់បាល់សរុប ៥គ្រាប់នៅព្រឹត្តិការណ៍ AFF Championship នេះបន្ទាប់ពីរកបានកាលពីឆ្នាំ២០១៦ ពីរគ្រាប់ និងឆ្នាំ២០១៨ មួយគ្រាប់តាមស្មើលោក ហុក សុចិត្រា ដែលមានប្រាំគ្រាប់ដូចគ្នា។ ក្រោយចប់ការប្រកួតគ្រូបង្វឹកកម្ពុជាលោក Ryu Hiroshe បានសំដែងអារម្មណ៍រីករាយតាមរយៈជ័យជំនះលើកនេះ ដែលនេះជាជ័យជំនះតាមការរំពឹងទុករបស់ក្រុមទាំងមូល ហើយជាក់ស្តែងក្រុមរបស់លោកនៅតែបន្តការគ្រប់គ្រងបាល់ ឱ្យបានច្រើនលើសគូប្រកួត។
ចំពោះការប្រកួតចំពោះមុខទល់នឹងវៀតណាមលោកមិនអាចទាយទុកបានឡើយ តែក្រុមរបស់លោកនឹងធ្វើឱ្យពីអស់លទ្ធភាព។ ងាកមកគ្រូបង្វឹកឡាវលោក V.Selvaraj ទោះបីចាញ់កម្ពុជា ៣-០ តែលោកគិតថា នេះជាការប្រកួតដែលឡាវធ្វើបានល្អជាងគេប្រៀបធៀបនឹងប្រកួតមុនៗ ដោយកូនក្រុមរបស់លោកបង្កើតឱកាសបានច្រើន តែកម្ពុជាជាក្រុមមានប្រៀបជាងតាមរយៈបទពិសោធរបស់ពួកគេ។ សូមបញ្ជាក់ថា ថ្វីបើទទួលបានជ័យជំនះក៏ពិតមែនកម្ពុជាអស់ឱកាសឡើងវគ្គបន្តហើយ តែនៅសល់មួយប្រកួតចុងក្រោយទល់នឹងវៀតណាមនៅថ្ងៃទី១៩ ខែធ្នូនេះ ខណៈឡាវបញ្ចប់បេសកកម្មហើយ៕
