15 បាល់ទាត់៖ ព្រឹត្តិការណ៍បាល់ទាត់ពិភពលោក FIFA World Cup 2022 នៅប្រទេសកាតាចុងឆ្នាំនេះ គ្រោងនឹងផ្លាស់ប្តូរកាលវិភាគបន្តិចបន្តួចគឺចាប់ផ្តើមមុនការគ្រោងទុកមួយថ្ងៃ។ កាលវិភាគចាស់គឺការប្រកួតបើកឆាកក្នុងពូល A គ្រោងធ្វើនៅថ្ងៃទី២១ ខែវិច្ឆិកា ឆ្នាំ២០២២ នេះរវាងក្រុមសេណេហ្កាល់ជួបហូឡង់។
តែនៅពេលនេះម្ចាស់ផ្ទះគ្រោងចាប់ផ្តើមមុនមួយថ្ងៃពោលគឺលើកមកថ្ងៃអាទិត្យ ទី២០ ខែវិច្ឆិការវាងក្រុមម្ចាស់ផ្ទះកាតាជួបអេក្វាដ័រជាជំនួបបើកឆាកវិញ។ ការផ្លាស់ប្តូរនេះគឺស្របតាមប្រពៃណីជាយូរមកហើយ ដោយក្រុមម្ចាស់ផ្ទះត្រូវចាប់ផ្តើមការប្រកួតមុនគេក្រោយពិធីបើកជាផ្លូវការ។ យ៉ាងណាក្តីគំរោងផ្លាស់ប្តូរកាលវិភាគប្រកួតមកមុនមួយថ្ងៃនេះ នៅមិនទាន់សំរេចផ្លូវការនៅឡើយ ពោលគឺ FIFA ត្រូវធ្វើការជជែកពិភាក្សាជាមួយបណ្តាភាគីពាក់ព័ន្ធជាមុនសិន។ កាតាស្ថិតក្នុងពូល A ដែលត្រូវជួបជាមួយអេក្វាដ័រ ខណៈសេណេហ្កាល់ជួបហូឡង់៕
