13 កូរ៉េខាងជើង៖ សារព័ត៌មានរដ្ឋបានរាយការណ៍នៅថ្ងៃព្រហស្បតិ៍នេះថា មេដឹកនាំកូរ៉េខាងជើងលោក Kim Jong Un បាននិយាយថា ប្រទេសរបស់លោកត្រៀមចល័តកម្លាំងទប់ទល់សង្គ្រាមនុយក្លេអ៊ែររួចរាល់ សម្រាប់ការប៉ះទង្គិចគ្នាដោយយោធាណាមួយជាមួយសហរដ្ឋអាមេរិក ស្របពេលមានសញ្ញាថា កូរ៉េខាងជើងអាចបាញ់សាកល្បងនុយក្លេអ៊ែរលើកដំបូងរបស់ខ្លួនចាប់តាំងពីឆ្នាំ២០១៧ មក។
លោក Kim បានថ្លែងបែបនេះអំឡុងសុន្ទរកថា នៅព្រឹត្តិការណ៍មួយនៅថ្ងៃប្រារព្ធខួបលើកទី ៦៩ឆ្នាំនៃការបញ្ចប់សង្គ្រាមកូរ៉េថ្ងៃទី២៧ ខែកក្កដា ដែលធ្វើឲ្យប្រទេសកូរ៉េទាំង២ នៅតែមានសង្គ្រាមជាមួយគ្នាតាមភាសាបច្ចេកទេសដោយមានត្រឹមតែបទឈប់បាញ់ នេះបើយោងតាមទីភ្នាក់ងារសារព័ត៌មានរដ្ឋកូរ៉េខាងជើង KCNA។ លោក Kim ក៏បានវាយប្រហារតបតវិញផងដែរ ទៅកាន់រដ្ឋបាលរបស់លោកប្រធានាធិបតីកូរ៉េខាងត្បូង Yoon Suk-yeol ដែលនិយាយថា រាល់ការប៉ុនប៉ងបង្កជម្លោះណាមួយពីកូរ៉េខាងជើង នឹងត្រូវឆ្លើយតបវិញដ៏ពិតប្រាកដ និងដ៏មហន្តរាយ។លោក Kim បាននិយាយថា ខ្ញុំចង់បញ្ជាក់ឲ្យបានច្បាស់ជាថ្មីម្ដងទៀតថា កូរ៉េខាងជើងបានត្រៀមខ្លួនយ៉ាងពេញលេញ សម្រាប់ការប្រឈមដោយយោធាណាមួយជាមួយសហរដ្ឋអាមេរិក។ ក្នុងពេលប៉ុន្មានខែថ្មីៗនេះ កូរ៉េខាងជើងបានបាញ់សាកល្បងមីស៊ីលល្បឿនលឿនជាងសំឡេង និងមីស៊ីលជាច្រើនគ្រាប់ ដែលខ្លួននិយាយថាអាចបំពាក់ក្បាលគ្រាប់នុយក្លេអ៊ែរតាកទិក ដែលក្រុងសេអ៊ូលព្រមានថា នឹងឆ្លើយតបចំពោះការវាយប្រហារដែលនឹងអាចកើតមាន៕
