15 អាស៊ានប៉ារ៉ាហ្គេម៖ ប្រតិភូ គ្រូបង្វឹក និងកីឡាករ-កីឡាការិនីជនពិការកម្ពុជាសរុបចំនួន ១៧៩នាក់ដែលបានចេញដំណើរតាមជើងយន្តហោះពិសេសដោយឥតគិតថ្លៃ ដើម្បីចូលរួមការប្រកួតកីឡាអាស៊ានប៉ារ៉ាហ្គេមលើកទី១១ ឆ្នាំ២០២២ បានមកដល់ទីក្រុងសូឡូ ប្រទេសឥណ្ឌូនេស៊ីដោយសុវត្ថិភាព បន្ទាប់ពីចាកចេញពីព្រះរាជាណាចក្រកម្ពុជានារសៀលថ្ងៃទី២៦ ខែកក្កដា ដោយមានការអញ្ជើញជូនដំណើរពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានប្រតិភូកីឡាប៉ារ៉ាឡាំពិកកម្ពុជាតំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា។
ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា និងជានាយបេសកកម្មបានបញ្ជាក់ថា ការជូនដំណើរពីសំណាក់ឯកឧត្តម ហ៊ុន ម៉ានី បានបង្ហាញនូវសេចក្ដីរីករាយ និងកក់ក្ដៅប្រកបដោយមោទនភាពធ្វើឲ្យកីឡាករ-កីឡាការិនីជនពិការកម្ពុជា បង្ហាញនូវភាពជឿជាក់ក្នុងការបំពេញបេសកកម្មមួយនេះ។ ឯកឧត្តមបានថ្លែងអំណរគុណសម្ដេចតេជោនាយករដ្ឋមន្ដ្រី ដែលបានយកចិត្តទុកដាក់ដ៏ខ្ពង់ខ្ពស់ចំពោះប្រតិភូកីឡាប៉ារ៉ាឡាំពិកកម្ពុជា ដោយសម្ដេចតេជោបានផ្តល់យន្ដហោះពិសេស (Charter Flight) ដើម្បីដឹកជញ្ជូនប្រតិភូ និងអត្តពលិកកម្ពុជាហោះហើរត្រង់ពីរាជធានីភ្នំពេញទៅទីក្រុងសូឡូដើម្បីធានាសុវត្ថិភាពទាំងទៅ ទាំងមក ក្នុងការបង្ការជំងឺកូវីដ-១៩ ទៀតផង ជាពិសេសឧបត្ថម្ភប្រាក់ហោប៉ាវ និងការចាក់វ៉ាក់សាំងដូសជំរុញផងដែរ។ ជាមួយនឹងការយកចិត្តទុកដាក់នេះ ឯកឧត្តមអគ្គលេខាធិការ និងអត្តពលិកទាំងអស់ប្តេជ្ញាប្រឹងប្រែងឲ្យអស់ពីសមត្ថភាព ដណ្តើមមេដាយមាសជូនជាតិ សម្តេចតេជោ ថ្នាក់ដឹកនាំ និងប្រជាពលរដ្ឋជាង ១៧លាននាក់ឲ្យបាន។
ឯកឧត្តម យី វាសនា ក៏បានផ្ដាំផ្ញើដល់អត្តពលិក គ្រូបង្វឹក គ្រូជំនួយ និងអ្នកបច្ចេកទេសឲ្យយកបេះដូងគិតពីតម្លៃរបស់ខ្លួនតំណាងឲ្យជាតិទាំងមូល និងប្រជាពលរដ្ឋជាង ១៧លាននាក់ ដូច្នេះយើងត្រូវធ្វើយ៉ាងណាដណ្តើមមេដាយមាសឲ្យបាន ដើម្បីបង្ហូតទង់ជាតិលើវេហាបង្ហាញពីមោទកភាព និងកិត្តិសព្ទកម្ពុជាលើឆាកអន្តរជាតិ។ ជាពិសេសជាការត្រៀមខ្លួនប្រកបដោយសក្ដានុពល សម្រាប់អត្តពលិកជនពិការកម្ពុជាដោយជោគជ័យ ទាំងការរៀបចំ និងការប្រកួតប្រជែងដណ្តើមមេដាយពីព្រឹត្តិការណ៍អាស៊ានប៉ារ៉ាហ្គេមលើកទី១២ នាឆ្នាំ២០២៣ នៅកម្ពុជា។ សូមបញ្ជាក់ថា ព្រឹត្តិការណ៍កីឡាអាស៊ានប៉ារ៉ាហ្គេមលើកទី១១ នៅឥណ្ឌូនេស៊ីនឹងប្រព្រឹត្តទៅពីថ្ងៃទី៣០ ខែកក្កដាដល់ថ្ងៃទី០៦ ខែសីហា ឆ្នាំ២០២២ ក្នុងនោះកម្ពុជាបានបញ្ជូនអត្តពលិកសរុបចំនួន ១១៥នាក់លើ ១១ប្រភេទកីឡាចូលរួមគឺមានកីឡាអត្តពលកម្ម ហែលទឹក បាល់ទះអង្គុយបុរស និងនារី បាល់បោះរទេះបុរស និងនារី បាល់បោះជនពិការភ្នែក បាល់ទាត់ ៧ម្ខាង (ចលករខួរក្បាល) វាយកូនឃ្លីលើតុ វាយសី លើកទម្ងន់ អុក និងប៊ូស្យា៕
