17 ស៊ីហ្គេម៖ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) នៅថ្ងៃទី២១ ខែកក្កដាម្សិលមិញ បានកោះប្រជុំជាមួយគណៈកម្មការជំនាញរបស់ខ្លួន ដើម្បីណែនាំបន្ថែម និងជំរុញភាពច្បាស់លាស់ក្នុងការអនុវត្ដតួនាទីភារកិច្ចឲ្យកាន់តែមានប្រសិទ្ធភាព ក្រោមយន្ដការរួម និងឯកភាពគ្នាតែមួយ។
ឯកឧត្តម វ៉ាត់ ចំរើន អគ្គលេខាធិការ CAMSOC បានគូសបញ្ជាក់ថា កិច្ចប្រជុំនេះផ្ដោតអំពីការធ្វើការដោយប្រទាក់ក្រឡាជាមួយគណៈកម្មការជំនាញទាំងអស់ ក៏ដូចជាការតាមដានវឌ្ឍនភាពការងាររបស់គណៈកម្មការជំនាញនីមួយៗ ថាកន្លងមកសម្រេចបានអ្វីខ្លះ ហើយមានឧបសគ្គអ្វីខ្លះ? ដើម្បីធានាបាននូវការត្រៀមលក្ខណៈគ្រប់ជ្រុងជ្រោយ សម្រាប់ដំណើរឆ្ពោះទៅព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជានាឆ្នាំក្រោយ។
សូមបញ្ជាក់ថា រាងរៀលសប្ដាហ៍ CAMSOC តែងបើកកិច្ចប្រជុំជាប្រចាំដើម្បីតាមដានវឌ្ឍនភាពការងារ ពិសេសដើម្បីពន្លឿនសកម្មភាពការងាររបស់គណៈកម្មការជំនាញនីមួយៗ ឲ្យបានរួចរាល់ត្រឹមឆមាសទី២ ឆ្នាំ២០២២ ស្របតាមអនុសាសន៍ណែនាំដ៏ខ្ពង់ខ្ពស់របស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC ដើម្បីត្រៀមលក្ខណៈទទួលរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមនាឆ្នាំ២០២៣ ខាងមុខ៕
