12 
ភ្នំពេញ៖ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) គ្រោងនឹងរៀបចំឧបករណ៍ការពាររន្ទះ នៅតាមតំបន់មួយចំនួនដែលតែងកើតមានរន្ទះ ខណៈបាតុភូតបង្កពីគ្រោះធម្មជាតិមួយនេះ បានបង្កឲ្យមានមនុស្សស្លាប់ និងសត្វពាហនៈងាប់ជារៀងរាល់ឆ្នាំ ។
ក្នុងវេទិការជាតិស្តីពី ការកាត់បន្ថយហានិភ័យគ្រោះមហន្តរាយ លើកទី២៩ ធ្វើឡើងនៅថ្ងៃទី១៣ ខែកក្កដា ឆ្នាំ២០២២ ឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ថា នៅកម្ពុជាមុខសញ្ញាគ្រោះថ្នាក់ដោយធម្មជាតិ កើតមានជារៀងរាល់ឆ្នាំបានបំផ្លិតបំផ្លាញទ្រព្យសម្បត្តិ អាយុជីវិត ក្នុងនោះមានទឹកជំនន់ ខ្យល់កន្ត្រាក់ រន្ទះបាញ់ រាំងស្ងួត បាក់ច្រាំងទន្លេ និងជំងឺរាតត្បាតជាដើម ។
ឯកឧត្តមបន្តថា បញ្ហាគ្រោះមហន្តរាយ អ្នកពាក់ព័ន្ធតែងគិតលើចំណុចផ្សេងៗ មិនបានគិតចំពោះបញ្ហារន្ទះបាញ់ ដែលបង្កគ្រោះថ្នាក់ដល់អាយុជីវិតពលរដ្ឋជាច្រើន ជារៀងរាល់ឆ្នាំផងដែរ ដូចនេះលេខាធិការដ្ឋានតាមបណ្ដារាជធានីខេត្ត ត្រូវមើលតំបន់ណាខ្លះ ដែលតែងកើតមានរន្ទះ ហើយនៅឆ្នាំនេះ គ.ជ.គ.ម គ្រោងគិតពីថវិកាជាតិ និងស្នើសុំទៅក្រសួងសេដ្ឋកិច្ច និងហិរញ្ញវត្ថុ ជួយពិនិត្យលទ្ធភាពដោះស្រាយបញ្ហានេះ ។
សម្រាប់វេទិកាជាតិនេះ ឯកឧត្តម គន់ គីម ជំរុញទៅមន្ត្រីលេខាធិការដ្ឋានរាជធានីខេត្ត និងអង្គការពាក់ព័ន្ធ ពិភាក្សា និងប្ដូរយោបល់គ្នា ដើម្បីប្រមូលធាតុចូលសរុបរាយការណ៍ ពាក់ព័ន្ធការងារកាត់បន្ថយគ្រោះមហន្តរាយ ឲ្យបានល្អប្រសើរ ។
ឯកឧត្តម ម៉ា នរឹទ្ធ អគ្គលេខាធិការរងគណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា វេទិកានេះ ធ្វើឡើងស្របពេលកម្ពុជាកំពុងអនុវត្តសកម្មភាពកាត់បន្ថយហានិភ័យគ្រោះមហន្តរាយ ក្រោមក្របខណ្ឌការងារសេនដាយ ២០២៥-២០៣០ ដែលពេលនេះ ការអនុវត្តបានប្រព្រឹត្តិទៅពាក់កណ្ដាលអាណត្តិ ទើប គ.ជ.គ.ម បានសម្រេចកណត់យកប្រធានបទ “វឌ្ឍនភាពនៃការអនុវត្តក្របខណ្ឌការងារសេនដាយ របស់ព្រះរាជាណាចក្រកម្ពុជា” ។
គួរបញ្ជាក់ថា សម្រាប់ផែនការបម្រុងទុក របស់គណៈកម្មាធិការជាតិគ្រប់គ្រងគ្រោះមហន្តរាយ ដើម្បីឆ្លើយតបនឹងគ្រោះមហន្តរាយ ពិសេសបញ្ហាទឹកជំនន់ នៅរដូវវស្សាឆ្នាំ២០២២នេះ គឺបានត្រៀមនូវកម្លាំងអន្តរាគមន៍ចំនួន១៦កង ទូទាំងប្រទេស ស្មើនឹងជិត ២០០០នាក់ រួមទាំងមានបំពាក់នូវសម្ភារសង្គ្រោះបន្ទាន់ យានជំនិះ និងស្បៀងបម្រុងជាច្រើនទៀត៕
