9 ភ្នំពេញ៖ មនុស្សយ៉ាងតិចចំនួន ១២នាក់បានស្លាប់ និង៤១នាក់ បានរងរបួសដោយសារអគ្គិភ័យ ខណៈផ្ទះ និងតូបរបស់ប្រជាពលរដ្ឋចំនួន ៤៨៦ខ្នង/តូប បានឆាបឆេះទាំងស្រុង ក្នុងរយៈពេលប្រាំមួយខែដើមឆ្នាំ២០២២នេះ។
នេះបើតាមការឱ្យដឹងពីឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្រ្គោះនៃអគ្គស្នងការដ្ឋាននគរបាលជាតិ។
ថ្លែងប្រាប់អ្នកយកព័ត៌មានក្រោយទទួលវគ្គបណ្តុះបណ្តាល ស្តីពីការប្រើប្រាស់ឧបករណ៍TIGER ដើម្បីស៊ើបអង្កេតករណីអគ្គិភ័យ នាព្រឹកថ្ងៃទី៦ ខែកក្កដា ឆ្នាំ២០២២នេះ ឧត្តមសេនីយ៍ឯក នេត វន្ថា បានបញ្ជាក់ថា ចាប់ពីខែមករាដល់ខែមិថុនា ឆ្នាំ២០២២នេះមានករណីអគ្គិភ័យចំនួន ៣៧២លើក បានបណ្តាលឱ្យមនុស្សស្លាប់ចំនួន ១២នាក់ រងរបួសចំនួន៤១នាក់ ផ្ទះនិងតូបជិត៥០០ខ្នង និងតូប។
តាមរយៈកិច្ចសម្ភាសន៍ជាមួយអ្នកសារព័ត៌មាននេះដែរ ឧត្តមសេនីយ៍ឯក នេត វន្ថា ក៏បានក្រើនរំលឹក និងអំពាវនាវដល់បងប្អូនជនរួមជាតិឱ្យមានការប្រុងប្រយ័ត្នខ្ពស់បន្ថែមទៀត ចំពោះអគ្គិភ័យនេះ ជាពិសេសប្រុងប្រយ័ត្នចំពោះចរន្តអគ្គិសនី និងភ្លើងហ្គាស៍ ធូប ទៀនជាដើម។
ដោយឡែកឧបករណ៍ទំនើប TIGER ដែលនាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ ទទួលបានពីសប្បុរសជននេះ ត្រូវបានឧត្តមសេនីយ៍ឯក នេត វន្ថា បញ្ជាក់ថា នឹងផ្តល់ផលប្រយោជន៍បានច្រើនអំពីមូលហេតុនៃការកើតករណីអគ្គិភ័យ ខណៈឧបករណ៍នេះគឺទើបតែមានជាលើកដំបូងសម្រាប់ប្រទេសកម្ពុជាយើងនេះ៕
