15 
(សេអ៊ូល)៖ មេដឹកនាំកូរ៉េខាងជើង លោក គីម ជុងអ៊ុន បានបើកកិច្ចប្រជុំការិយាល័យនយោបាយបន្ទាន់មួយ និងបានបញ្ជាឱ្យយោធាចូលរួមក្នុងការរក្សា ស្ថិរភាពនៃការផ្គត់ផ្គង់ថ្នាំពេទ្យនៅក្នុងទីក្រុងព្យុងយ៉ាង ខណៈកំពុងប្រយុទ្ធតស៊ូនឹងការឆ្លងរាលដាល COVID-19។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters នៅថ្ងៃចន្ទ ទី១៦ ខែឧសភា ឆ្នាំ២០២២។
កូរ៉េខាងជើងបានទទួលស្គាល់ពីការផ្ទុះរាលដាល COVID-19 ជាលើកដំបូងបំផុតនៅក្នុងប្រទេសរបស់ខ្លួន កាលពីសប្ដាហ៍មុន ហើយក្រុមអ្នកជំនាញជាច្រើន បារម្ភថាស្ថានភាពឆ្លងអាចនឹងមានសភាពកាន់តៃធ្ងន់ធ្ងរ ដោយសារតែប្រទេសឯកោមួយនេះមិនមានបរិក្ខារវេជ្ជសាស្ត្រគ្រប់គ្រាន់ និងត្រូវបានគេរាយការណ៍ថា មិនមានកម្មវិធីចាក់វ៉ាក់សាំងបង្ការដល់ប្រជាជនរបស់ខ្លួននោះទេ។
យ៉ាងណាក៏ដោយ ក្នុងនៅកិច្ចប្រជុំការិយាល័យបន្ទាន់មួយ កាលពីថ្ងៃអាទិត្យចុងសប្ដាហ៍កន្លងទៅនេះ លោក គីម ជុងអ៊ុន បានរិះគន់យ៉ាងខ្លាំងចំពោះ ភាពគ្មានទំនួលខុសត្រូវរបស់មន្ត្រីសុខាភិបាលកូរ៉េខាងជើងមួយចំនួន និងបានបញ្ជាឱ្យយោធាចូលរួមក្នុងការប្រយុទ្ធប្រឆាំងនឹង COVID-19 ដើម្បីរក្សាស្ថិរភាព ការផ្គត់ផ្គង់ថ្នាំពេទ្យនៅក្នុងទីក្រុងព្យុងយ៉ាង។ បើតាមប្រព័ន្ធផ្សព្វផ្សាយរដ្ឋកូរ៉េខាងជើង KCNA លោក គីម ជុងអ៊ុនក៏បានធ្វើទស្សនកិច្ចទៅកាន់ឱសថស្ថានមួយ មានទីតាំងស្ថិតនៅក្បែរទន្លេ Taedong ក្នុងទីក្រុងព្យុងយ៉ាងផងដែរ ក្នុងគោលបំណងត្រួតពិនិត្យការផ្គត់ផ្គង់ និងការលក់ថ្នាំពេទ្យ។
គួរបញ្ជាក់ថា គិតត្រឹមថ្ងៃអាទិត្យចុងសប្ដាហ៍កន្លងទៅនេះ កូរ៉េខាងជើងបានរាយការណ៍ពីអ្នកស្លាប់ដោយសារ COVID-19 កើនដល់ ៥០នាក់ នៅក្នុងចំណោម មនុស្សច្រើនជាង ៣៩២,៩២០នាក់ ដែលមានរោគសញ្ញាគ្រុនក្ដៅ។ ប៉ុន្តែមិនទាន់បញ្ជាក់ថាតើមានមនុស្សប៉ុន្មាននាក់ឆ្លង COVID-19 នោះទេ៕
