16 
បាល់ទាត់៖ តារាងបាល់ទាត់វៀតណាម Nguyen Quang Hai កំពុងមានមហិច្ចតាចង់ផ្លាស់ទៅលេងនៅតំបន់អឺរ៉ុបនៅពេលចាកចេញពី Hanoi FC។ បន្ទាប់ពីស៊ុតបញ្ចូលទីគ្រាប់ជ័យជំនះឱ្យ Hanoi FC នៅក្របខណ្ឌ V-League សប្តាហ៍មុន Quang Hai បានចាប់ផ្តើមពិភាក្សារពីអនាគតរបស់ខ្លួនជាមួយនឹងប្រធានក្លិប Hanoi FC លោក Do Quang Hien។
ខ្សែបម្រើវ័យ ២៥ឆ្នាំរូបនេះធ្លាប់បាននិយាយថា គេចង់ចំណាយពេលលេងបាល់ទាត់ក្រៅប្រទេសវៀតណាម ១ឆ្នាំ។ កិច្ចសន្យារបស់ Nguyen Quang Hai នឹងអស់សុពលភាពជាមួយ Hanoi FC នៅថ្ងៃទី១២ ខែមេសាខាងមុខនេះហើយ ខណៈដែលការចរចាកិច្ចសន្យាថ្មីអាចទៅរួច លុះត្រាក្លិបអនុញ្ញាតឱ្យចំណាយពេលខ្ចីជើងមួយឆ្នាំនៅតំបន់អឺរ៉ុប។ មកដល់ពេលនេះ Hai ក៏បានបដិសេធរួចរាល់ហើយដែរពីកិច្ចសន្យាថ្មី ខណៈដែលគេនឹងលេងពីរប្រកួតទៀតប៉ុណ្ណោះឱ្យ Hanoi FC។
សារព័ត៌មានកីឡាក្នុងស្រុកមួយបានចុះផ្សាយថា Hanoi FC បានផ្តល់ប្រាក់ខែច្រើនសន្ធឹកសន្ធាប់ដើម្បីរក្សា Nguyen Quang Hai នៅបន្តតែត្រូវបានច្រានចោលដោយកីឡាករវ័យ ២៥ឆ្នាំរូបនេះ។ សូមបញ្ជាក់ថា Nguyen Quang Hai ជាកីឡាករដែលចេញពីថ្នាលយុវជនរបស់ Hanoi FC ឈ្នះពានជាច្រើនជាមួយក្រុម បូករួមទាំងពានបាល់មាសនៅឆ្នាំ២០១៨។ កន្លងមក Hai ធ្លាប់បានសន្យាថានឹងមិនលេងឱ្យក្លិបផ្សេងទៀតឡើយក្នុងក្របខណ្ឌ V-League នេះ៕
