16 
បាល់ទាត់៖ ខ្សែប្រយុទ្ធវ័យក្មេងដែលកំពុងឡើងជើង លឹម ពិសុទ្ធ នឹងត្រូវអវត្តមានពីទីលានយ៉ាងហោច ២ខែបន្ទាប់ពីពិនិត្យឃើញបែកទ្រនាប់ជង្គង់ជើងខាងឆ្វេងត្រូវធ្វើការវះកាត់ និងព្យាបាល។ នេះបើតាមការជូនដំណឹងរបស់ក្លិបភ្នំពេញក្រោន បន្ទាប់ពីក្លិបបានបញ្ចូនរូបគេទៅពិនិត្យយ៉ាងយកចិត្តទុកដាក់ពីក្រុមគ្រូពេទ្យកាលពីថ្មីៗ។
អតីតក្រុមជើងឯកលីគ ៧សម័យនេះបានធ្វើការថ្លែងអំណរគុណចំពោះការយកចិត្តទុកដាក់របស់អ្នកគាំទ្រ ក៏ដូចជាសហព័ន្ធកីឡាបាល់ទាត់កម្ពុជាដែលបានសហការជាមួយក្លិប ក្នុងករណីព្យាបាលរបួសរបស់កីឡាករជម្រើសជាតិកម្ពុជាតិរូបនេះ ស្របពេល ពិសុទ្ធ អាចនឹងត្រូវឃ្លៀតឆ្ងាយពីទីលានចន្លោះពី ២ ទៅ ៣ខែ។ នៅលើបណ្ដាញសង្គមរបស់ក្រុមសិង្ហក្រហមនេះបានបង្ហាញនូវក្ដីសង្ឃឹមថា លឹម ពិសុទ្ធ នឹងត្រូវមកវិញជាមួយភាពរឹងមាំសម្រាប់ក្រុមភ្នំពេញក្រោន ព្រមទាំងឱកាសក្នុងក្រុមជម្រើសជាតិកម្ពុជា បន្ទាប់ពីជាសះស្បើយពីរបួសផងដែរ។ សូមបញ្ជាក់ថា លឹម ពិសុទ្ធ ត្រូវបានលោក Keisuke Honda អ្នកចាត់ការទូទៅក្រុមជម្រើសជាតិកម្ពុជាបង្ខំចិត្តកាត់ចេញពីបញ្ជីឈ្មោះកីឡាករ ២៨នាក់ចុងក្រោយដើម្បីចូលរួមប្រកួតពានរង្វាន់ AFF U23 Championship 2022 ភ្លាមៗ បន្ទាប់ពីពិនិត្យឃើញថា ពិសុទ្ធ មានបញ្ហារបួសជង្គង់មិនអាចបន្ដហ្វឹកហាត់ និងប្រកួតទៀតបាន៕
