12 
បាល់ទាត់៖ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជាថា លោក និងកីឡាករត្រូវការអ្នកគាំទ្រចូលរួមទស្សនាផ្ទាល់ ខណៈក្រុមជម្រើសជាតិអាយុក្រោម ២៣ឆ្នាំកម្ពុជាត្រូវជួបក្រុម U23 ព្រុយណេនាវេលាម៉ោង ៧យប់នេះនៅពហុកីឡដ្ឋានជាតិមរតកតេជោ ដែលជាប្រកួតដំបូងរបស់ខ្លួនក្នុងយុទ្ធនាការប្រកួតពានរង្វាន់ AFF U23 Championship 2022 ពូល A នៅរាជធានីភ្នំពេញ។
លោក Honda បានបង្ហាញក្ដីរំពឹងថា នឹងមានអ្នកគាំទ្រច្រើនចូលរួមទស្សនាផ្ទាល់នៅកីឡដ្ឋានក្នុងការប្រកួតយប់នេះ ទោះបីលោកដឹងថា ស្ថិតក្នុងស្ថានភាពដ៏លំបាកក្នុងបរិបទកូវីដ-១៩ តែកីឡាករ និងរូបលោកផ្ទាល់ពិតជាត្រូវការអ្នកគាំទ្រដើម្បីចូលរួមទស្សនា គាំទ្រ និងលើកទឹកចិត្តដល់ក្រុមជម្រើសជាតិកម្ពុជាក្នុងការប្រកួតដ៏សំខាន់នេះ។ គួរដឹងថា ក្រុមគោព្រៃកម្ពុជាបានបង្ហាញបញ្ជីឈ្មោះកីឡាករ ២៨នាក់ចុងក្រោយ សម្រាប់ចូលរួមប្រកួតព្រឹត្តិការណ៍ប្រចាំតំបន់នេះកាលពីថ្ងៃទី១២ ខែកុម្ភៈកន្លងទៅ បន្ទាប់ពីហ្វឹកហាត់ផ្ទាល់ជាមួយលោក Honda បាន ៤ថ្ងៃក្នុងនោះមានកីឡាករបឹងកេត ៧នាក់, ព្រះខ័នរាជស្វាយរៀង ៣នាក់, ភ្នំពេញក្រោន ៣នាក់, វិសាខា ៦នាក់, ព្រៃវែង ៤នាក់, កងយោធពលខេមរភូមិន្ទ ២នាក់, អគ្គិសនីកម្ពុជា ២នាក់ និងអង្គរថាយហ្គឺរម្នាក់។
យុទ្ធនាការនេះកម្ពុជាស្ថិតក្នុងពូល A ជាមួយហ្វីលីពីន ទីម័រខាងកើត និងព្រុយណេ ខណៈប្រកួតដំបូងរបស់ក្រុមម្ចាស់ផ្ទះកម្ពុជានឹងត្រូវជួបក្រុម U23 ព្រុយណេនាវេលាម៉ោង ៧យប់នេះ ពោលគឺក្រោយចប់ការប្រកួតរវាងទីម័រខាងកើត និងហ្វីលីពីនដែលនឹងចាប់ផ្ដើមការប្រកួតនាវេលាម៉ោង ៤ល្ងាចនៅពហុកីឡដ្ឋានជាតិមរតកតេជោដូចគ្នា។ ការប្រកួតទាំង ២គូនេះនឹងមានផ្សាយផ្ទាល់លើកញ្ចក់ទូរទស្សន៍ BTV-News។ ដោយឡែក ២ពូលផ្សេងទៀតក្នុងនោះពូល B នៅសល់បេក្ខភាព ៣ក្រុមប៉ុណ្ណោះបន្ទាប់ពីឥណ្ឌូនេស៊ីដកខ្លួន រួមមានម៉ាឡេស៊ី មីយ៉ាន់ម៉ា និងឡាវ។ រីឯពូល C មាន ៣ក្រុមដូចគ្នាគឺមានថៃ វៀតណាម និងសិង្ហបុរី។ សម្រាប់កម្មវិធីប្រកួតបន្ទាប់នៅថ្ងៃទី១៥ ខែកុម្ភៈស្អែកគឺមានតែ ១ប្រកួតប៉ុណ្ណោះរវាងក្រុម U23 ម៉ាឡេស៊ី និងមីយ៉ាន់ម៉ានៅពហុកីឡដ្ឋានព្រីនស៍៕
