15 
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បានស្នើដល់អាជ្ញាធរគ្រប់ លំដាប់ថ្នាក់ នៃរាជធានី-ខេត្តទាំងអស់ត្រូវធានាសុវត្ថិភាព និងបង្ករលក្ខណៈងាយស្រួលដល់គ្រប់គណបក្សនយោបាយទាំងអស់ ដែលបានចុះបញ្ជីនៅក្នុងក្រសួងមហាផ្ទៃ ដើម្បីធ្វើយ៉ាងណាស្របតាមគោលការណ៍លទ្ធិប្រជាធិបតេយ្យ សេរីពហុបក្ស។
យោងតាមសេចក្តីណែនាំរបស់សម្តេចក្រឡាហោ ស ខេង ជូនដល់អភិបាលនៃគណៈអភិបាលរាជធានី-ខេត្ត ដែលទូរទស្សន៍BTV ទទួលបាននាថ្ងៃទី៨ ខែកុម្ភៈ ឆ្នាំ២០២២នេះ បានលើកឡើងថា ដើម្បី បង្ករលក្ខណៈងាយស្រួលដល់គណកប្សនយោបាយដែលបានចុះបញ្ជីត្រឹមត្រូវតាមច្បាប់ ចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ឆ្នាំ២០២២ និងការបោះឆ្នោតជ្រើសរើសតំណាងរាស្រ្ត អាណត្តិទី៧ឆ្នាំ២០២៣ ខាងមុខ ប្រកបដោយលក្ខណៈ សេរី ត្រឹមត្រូវ និងយុត្តិធម៌ សម្របតាមគោលការណ៍លទ្ធិប្រជាធបតេយ្យ សេរីពហុបក្ស និងដើម្បីធានាការអនុវត្តឲ្យបានត្រឹមត្រូវតាម ច្បាប់ស្តីពីគណបក្សនយោបាយ ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងសកលនោះ ក្រសួងមហាផ្ទៃ«សូមស្នើឲ្យរដ្ឋបាលរាជធានី-ខេត្ត និងអាជ្ញាធរមានសមត្ថកិច្ចពាក់ព័ន្ធនៅថ្នាក់ក្រោមជាតិ ត្រូវបង្ករលក្ខណៈងាយស្រួលដល់គ្រប់គណបក្សនយោបាយដែលបានចុះបញ្ជីរួចហើយនៅក្រសួងមហាផ្ទៃ ក្នុងការធ្វើសកម្មភាពនានាស្របតាមច្បាប់ដែលបានអនុញ្ញាត»។
តាមរយៈសេចក្តីណែនាំនេះ សម្តេចក្រឡាហោម ស ខេង បានលើកឡើងថា ការបើកទីស្នាក់ការ គណបក្សការលើកផ្លាកសញ្ញាគណបក្ស ការជួបប្រជុំនយោបាយ ឬការជួបជុំមន្រ្តីគណបក្ស នៅតាមមូលដ្ឋានឯកជន ឬក៏ទីតាំងឯកជននានា ត្រូវមានការយល់ព្រមជាមុនពីម្ចាស់កម្មសិទ្ធទាំងនោះ ដោយមានកិច្ចសន្យាជួល ឬកិច្ចព្រមព្រៀងជាលាយលក្ខណ៍អក្សរ។
ទន្ទឹមនេះសាមីគណបក្សនយោបាយនីមួយៗគ្រាន់ តែជូនដំណឹងជាលាយលក្ខណ៍អក្សរទៅអាជ្ញាធរឃុំ សង្កាត់អំពីការបើកទីស្នាក់ការ ការដាក់តាំងផ្លាក់សញ្ញា គណបក្ស ឬការប្រជុំតែប៉ុណ្ណោះ ដោយមិនតម្រូវឲ្យសុំការអនុញ្ញាតជាមុនពីអាជ្ញាធរនោះឡើយ។
បន្ទាប់ពីទទួលបានលិខិតជាលាយលក្ខណ៍អក្សររបស់គណបណបក្សរួចហើយ អាជ្ញាធរឃុំ សង្កាត់ ត្រូវរាយការណ៍ ជូនអាជ្ញាធរក្រុង ខណ្ឌ រាជធានី ខេត្តដើម្បីសម្របសម្រួលជាមួយសមត្ថកិច្ចពាក់ព័ន្ធក្នុងការគាំទ្រ និងសហការអនុវត្តតាមសមត្ថកិច្ចរៀងៗខ្លួន។
យ៉ាងណាក៏ដោយគ្រប់គណបក្សនយោបាយ ម្ចាស់លំនៅដ្ឋាន ឬម្ចាស់ទីតាំងឯកជន ត្រូវផ្តល់នូវកិច្ចសហការជាមួយអាជ្ញាធរមានសមត្ថកិច្ចប្រកបដោយការយោគយល់អំពីវិធានការសន្តិសុខ សណ្តាប់ធ្នាប់ និងសុវត្ថិភាពសាធារណៈ ដោយគ្រប់គណបក្សនយោបាយទាំងអស់ត្រូវពិគ្រោះយោបល់ជាមួយអាជ្ញាធរដោយមានការយោគយល់គ្នាទៅវិញទៅមក អំពីបញ្ហាសន្តិសុខ សណ្តាប់ធ្នាប់ សុវត្ថិភាពសាធារណៈ និងអនាម័យសាធារណៈ រួមទំាងវិធានការសុខាភិបាលជាដើម៕
