10 
បាល់ទាត់៖ ខ្សែប្រយុទ្ធជម្រើសជាតិកម្ពុជា ចាន់ វឌ្ឍនាកា នឹងធ្វើការវះកាត់តសរសៃរបួសជង្គង់ខាងស្ដាំក្នុងសប្ដាហ៍នេះ នៅរាជធានីភ្នំពេញដោយក្រុមគ្រូពេទ្យជំនាញថៃ។ នេះបើតាមការបញ្ជាក់របស់ឯកឧត្តម ចាន់ ចេស្ដា ឪពុកបង្កើតរបស់កីឡាករស្នូលនៃក្លិបនាគខៀវបឹងកេតរូបនេះ។
រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទដដែលបានឲ្យដឹងថា ដោយទទួលបានព័ត៌មានពីក្លិបបឹងកេត ដើម្បីកាត់បន្ថយភាពស្មុគស្មាញក្នុងការធ្វើដំណើរទាំងមុន និងក្រោយការវះកាត់នៅប្រទេសថៃ ក្រុមគ្រូពេទ្យថៃក៏សម្រេចបញ្ជូនក្រុមជំនាញវះកាត់មកធ្វើការវះកាត់ ចាន់ វឌ្ឍនាកា នៅក្រុងភ្នំពេញតែម្ដង។ គួរដឹងថា ចាន់ វឌ្ឍនាកា បានរងរបួសដាច់សរសៃជង្គង់ខាងស្ដាំ (ACL) អំឡុងជួយក្រុមក្នុងការប្រកួតពានរង្វាន់លក្ខណៈមិត្តភាពជាមួយក្រុមវិសាខាកាលពីថ្ងៃទី២៦ ខែមករាកន្លងទៅ។ របួសនេះបានធ្វើឲ្យអ្នកគាំទ្រជាច្រើនមានការព្រួយបារម្ភ។ ទន្ទឹមជាមួយគ្នា សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក៏បានឧបត្ថម្ភថវិកាផ្ទាល់របស់សម្ដេចចំនួន ៥ម៉ឺនដុល្លារដល់ ចាន់ វឌ្ឍនាកា សម្រាប់ព្យាបាលរបួសផងដែរ៕
