20 
បាល់ទាត់៖ ការប្រកួតបាល់ទាត់ជើងឯកអាស៊ីអាគ្នេយ៍យុវជនអាយុក្រោម ២៣ឆ្នាំ AFF U23 Championship 2022 នៅប្រទេសកម្ពុជា បានចាប់ឆ្នោតបែងចែកពូលរួចរាល់ហើយកាលពីរសៀលថ្ងៃទី២៩ ខែធ្នូ ដោយបែងចែកជា ៣ពូល ខណៈកម្ពុជាស្ថិតក្នុងពូល A ជាមួយក្រុម U23 ទីម័រខាងកើត ហ្វីលីពីន និងព្រុយណេ។
ចំណែកលទ្ធផល ២ពូលទៀតរួមមានពូល B មានក្រុម U23 ឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ ខណៈពូល C មានថៃ វៀតណាម និងសិង្ហបុរី។ មន្ដ្រីបច្ចេកទេសសហព័ន្ធកីឡាបាល់ទាត់អាស៊ីអាគ្នេយ៍ (AFF) បានឲ្យដឹងថា ការប្រកួតនេះនឹងប្រើរូបមន្ដប្រកួតវិលជុំសន្សំពិន្ទុ ១ជុំ ហើយក្រុមមានពិន្ទុខ្ពស់ជាងគេ ឬក្រុមលេខ១ នៃពូលនីមួយៗរួមជាមួយក្រុមលេខ២ ល្អជាងគេ ១ក្រុមនឹងត្រូវឡើងវគ្គពាក់កណ្ដាលផ្ដាច់ព្រ័ត្រ។ សូមបញ្ជាក់ថា ព្រឹត្តិការណ៍បាល់ទាត់យុវជនអាយុក្រោម ២៣ឆ្នាំប្រចាំតំបន់អាស៊ាននេះនឹងធ្វើការប្រកួតនៅប្រទេសកម្ពុជា ចាប់ពីថ្ងៃទី១៤ ដល់ថ្ងៃទី២៦ ខែកុម្ភៈ ឆ្នាំ២០២២ ខាងមុខ ដោយប្រើប្រាស់ទីលានចំនួន ២ គឺពហុកីឡដ្ឋានជាតិមរតកតេជោ និងកីឡាព្រីនស៍៕
